ബിസിനസ്‌

യുകെയില്‍ തിരഞ്ഞെടുപ്പ് രംഗം ചൂട് പിടിക്കുകയും ടോറി പാര്‍ട്ടി ചെറിയ ഭൂരിപക്ഷം നേടിയായാലും അധികാരത്തിലെത്തുമെന്നുമുള്ള അഭിപ്രായ സര്‍വേകള്‍ മൂലം യൂറോക്കും ഡോളറിനുമെതിരെ പൗണ്ടിന് മികച്ച നില . യൂറോക്കെതിരെ മികച്ച നിലയിലെത്തിയിരിക്കുകയാണ് പൗണ്ട്. യൂറോയ്ക്കെതിരേ 1.17ല്‍ എത്തി. രണ്ടുമാസം മുമ്പ് 1.9 ലും താഴെ പോയിരുന്നു മൂല്യം. ഇന്റര്‍ബാങ്ക് നിരക്കില്‍ യൂറോക്കെതിരെ 6 മാസത്തെ ഉയര്‍ന്ന നിരക്കിലേക്ക് എത്തി. ഇത് 2019 മെയ് 5 ന് ശേഷമുള്ള ഏറ്റവും ഉയര്‍ന്ന പോയിന്റാണ്. 2019 ലെ പൗണ്ട് / യൂറോ ഇന്റര്‍ബാങ്ക് ഉയര്‍ന്ന നിരക്ക് മാര്‍ച്ച് 12 ന് 1.1763 ആണ് കൂടാതെ മെയ് 5 ന് 1.1758 ഉം എത്തിയിരുന്നു. പിന്നീട് പടിപടിയായി ഇടിയുകയായിരുന്നു. ഡോളറിനെതിരെ സമീപകാലത്തെ ഏറ്റവും മികച്ച നിലയായ 1.290 പോയിന്റിലെത്തിയിരുന്നു. രൂപയ്‌ക്കെതിരെ 92.32 ആണ്.

നോ ഡീല്‍ ബ്രക്സിറ്റ് ഭീതി ആയിരുന്നു പൗണ്ടിന്റെ ഇടിവിനു പ്രധാന കാരണം. എന്നാല്‍ ഡീലോടുകൂടിയുള്ള ബ്രക്സിറ്റ് ഉണ്ടാവും എന്നതും ഡിസംബര്‍12 ലെ തിരഞ്ഞെടുപ്പില്‍ ഭൂരിപക്ഷ സര്‍ക്കാര്‍ വരുമെന്ന പ്രതീക്ഷയും സമ്പദ്‌വ്യവസ്ഥയ്ക്കു ഉണര്‍വേകി. ഇതിന്റെ ഭാഗമായാണ് പൗണ്ട് കരുത്തു നേടുന്നത്.

വോട്ടെടുപ്പില്‍ പെട്ടെന്നുള്ള മാറ്റം ഉണ്ടെങ്കിലോ അല്ലെങ്കില്‍ ജന വികാരത്തിലും ബ്രക്സിറ്റുമായി ബന്ധപ്പെട്ട പ്രശ്നങ്ങളിലും എന്തെങ്കിലും മാറ്റം കണ്ടാല്‍ അത് പൗണ്ട് നിലയെ ബാധിക്കാം. എല്ലാ സീറ്റുകളിലും മത്സരിക്കുന്നതില്‍ നിന്നും കണ്‍സര്‍വേറ്റീവുകളുടെ ഒരു സീറ്റിലും മത്സരിക്കാതിരിക്കാനുമുള്ള ബ്രക്‌സിറ്റ് പാര്‍ട്ടിയുടെ നീക്കം പൗണ്ട് ഉയരുന്നതിനിടയാക്കി. ഇതുവഴി ലീവ് വോട്ട് വിഭജിക്കാനുള്ള സാധ്യത കുറവാണെന്നും ഇത് യാഥാസ്ഥിതിക വിജയത്തിനുള്ള സാധ്യത വര്‍ദ്ധിപ്പിക്കുമെന്നും ഉള്ള വിലയിരുത്തലുകളുണ്ട് . ബ്രക്‌സിറ്റ് വിഷയത്തില്‍ ഏറ്റുമുട്ടല്‍ ഒഴിവായതും വിദേശ നിക്ഷേപകരുടെ ഭീതിയൊഴിഞ്ഞതും ബ്രക്സിറ്റിനു ശേഷമുള്ള രാഷ്ട്രീയ സ്ഥിരതാ പ്രതീക്ഷയുമാണ് സമ്പദ്‌വ്യവസ്ഥയ്ക്കു ഉണര്‍വേകുന്നത്. കാലാവധി തികയ്ക്കാതെ രണ്ടാമതും തിരഞ്ഞെടുപ്പ് വേണ്ടിവന്നത് തിരിച്ചടിയാണെങ്കിലും ബ്രക്‌സിറ്റ് ഇനി ഒരു കീറാമുട്ടിയാവില്ല എന്ന പ്രതീക്ഷയാണ് ബിസിനസ് ലോകത്തിനുള്ളത്.

പ്രധാനമന്ത്രി ബോറിസ് ജോണ്‍സന്റെ അവസാന വട്ട ബ്രക്‌സിറ്റ് ഡീലിനായുള്ള ഇടപെടലുകളും യൂറോപ്യന്‍ നേതാക്കളുമായുള്ള കൂടിക്കാഴ്ചകളും പൗണ്ടിന് അനുകൂല സാഹചര്യം ഒരുക്കി. പൗണ്ടിന് വലിയ വീഴ്ച ഉണ്ടാകുമെന്ന ആശങ്കയില്‍ കഴിഞ്ഞിരുന്ന യുകെയിലെ പ്രവാസികള്‍ക്ക് ഇപ്പോഴത്തെ നേട്ടം സന്തോഷം നല്‍കുന്നു. ഈ ദിവസങ്ങളില്‍ നാട്ടിലേയ്ക്ക് കൂടുതല്‍ പണം അയക്കപ്പെടുന്നുണ്ട്.