ഹെല്സിങ്കി: ലോകത്തെ ഏറ്റവും പ്രായം കുറഞ്ഞ പ്രധാനമന്ത്രിയായി ചരിത്രത്തിലിടം നേടിയ ഫിന്ലന്ഡിലെ സന്നാ മാരിന് തന്റെ പ്രഖ്യാപനം വഴിയും വാര്ത്താ താരമായി . ആഴ്ചയില് 4 പ്രവൃത്തി ദിവസം കൊണ്ടുവരാനും ദിവസം ആറ് മണിക്കൂര് ജോലി സമയം നിശ്ചയിക്കാനുമാണ് സന്നാ മാരിന്റെ നിര്ദ്ദേശം.
കുടുംബത്തോടൊപ്പം ആളുകള്ക്ക് കൂടുതല് സമയം ചെലവിടാനാവണമെന്നാണ് സന്നാ മാരിന് പറയുന്നത്. നിലവില് ഫിന്ലാന്ഡില് ദിവസം ജോലി സമയം എട്ട് മണിക്കൂര് ആണ്. ആഴ്ചയില് അഞ്ച് പ്രവൃത്തി ദിനവും. അയല്രാജ്യമായ സ്വീഡനില് , 2015 മുതല് ആറ് മണിക്കൂര് ദൈര്ഘ്യമുള്ള ജോലി ദിവസം ഏര്പ്പെടുത്തി.
പ്രധാനമന്ത്രിയായിരുന്ന അന്റി റിന്നെയുടെ രാജിയെ തുടര്ന്നാണ് ഗതാഗതമന്ത്രി സന്നാ മാരിനെ (34) പ്രധാനമന്ത്രി പദത്തിലേക്ക് തിരഞ്ഞെടുത്തത്. സോഷ്യല് ഡെമോക്രാറ്റിക് പാര്ട്ടി നേതാവ് സന്നാ 2015 മുതല് ഫിന്ലന്ഡ് പാര്ലമെന്റ് അംഗമാണ് .
2012-ല് ടാംപേര് സിറ്റി കൗണ്സിലിലേക്ക് തിരഞ്ഞെടുക്കപ്പെടുന്നതോടെയാണ് സന്നാ ഫിന്ലന്ഡ് രാഷ്ട്രീയത്തില് സജീവമാകുന്നത്. 2013 മുതല് 2017 വരെ സിറ്റി കൗണ്സില് ചെയര്പേഴ്സണായി ചുമതല വഹിച്ച സന്നാ പിന്നീട് പാര്ലമെന്റിലേക്ക് തിരഞ്ഞെടുക്കപ്പെട്ടു.
