വാഷിങ്ടണ്: ഇറാഖിലെ യുഎസ് സൈനിക താവളങ്ങള്ക്ക് നേരെ ഇറാന് മിസൈലാക്രമണം നടത്തിയതിന് പിന്നാലെ എങ്ങും യുദ്ധഭീതി. ഗള്ഫ് മേഖലയില് അതീവ ജാഗ്രതാ നിര്ദേശം ആണ്. നിരവധി വിമാനങ്ങള് വഴിതിരിച്ചുവിട്ടു. ഇറാഖ്, ഇറാന്, പേര്ഷ്യന് ഗള്ഫ്, ഒമാന് ഉള്ക്കടല് തുടങ്ങിയ രാജ്യങ്ങളുടെ വ്യമാതിര്ത്തിക്കുള്ളില് പ്രവേശിക്കരുതെന്ന് യുഎസ് യാത്രാവിമാനങ്ങള്ക്ക് ഫെഡറല് ഏവിയേഷന് അഡ്മിനിസ്ട്രേഷന് കര്ശന നിര്ദേശം നല്കി.
യുഎസ് സേനാ കേന്ദ്രങ്ങളിലേക്കുളള ആക്രമണം സംബന്ധിച്ച വിവരങ്ങള് പ്രസിഡന്റ് ഡോണള്ഡ് ട്രംപ് ദേശീയ സുരക്ഷാ സംഘവുമായി നേരിട്ട് വിലയിരുത്തിയതായി വൈറ്റ്ഹൗസ് പ്രത്യേക വാര്ത്താക്കുറിപ്പില് അറിയിച്ചു. ഇറാനുനേരെ ആക്രമണം നടത്താനായുള്ള ഒരുക്കത്തിലാണ് സേന. ആക്രമണം നേരിട്ടാകുന്നതോടെ സ്ഥിതി കൈവിട്ടുപോകുമെന്ന ആശങ്കയാണ് ഉയരുന്നത്.
തങ്ങള്ക്ക് നേരെ ആക്രമണത്തിന് തുനിഞ്ഞാല് യുഎസിന്റെ സഖ്യകക്ഷികളേയും വെറുതെ വിടില്ലെന്നും ഇറാന് സൈന്യം അറിയിച്ചു. യുകെ അടക്കമുള്ള രാജ്യങ്ങള്ക്കുള്ള മുന്നറിയിപ്പാണിത്. രംഗം വഷളായ സാഹചര്യത്തില് ചില നാറ്റൊ സഖ്യരാജ്യങ്ങള് തങ്ങളുടെ സൈനിക ഉദ്യോഗസ്ഥരെ ഇറാഖില് നിന്ന് നീക്കാനുള്ള നടപടികള് സ്വീകരിച്ചിട്ടുണ്ട്.
ഇറാന് ഉടന് തിരിച്ചടി നല്കുമെന്ന് സൂചന നല്കി 'എല്ലാം നല്ലതിനാണ്, ലോകത്തെ ഏറ്റവും ശക്തവും സുസജ്ജവുമായ സൈന്യം ഞങ്ങള്ക്കുണ്ടെന്ന്' ട്രംപ് പറഞ്ഞു. ട്വിറ്ററിലൂടെയായിരുന്നു ട്രംപിന്റെ പ്രതികരണം. സൈനിക താവളത്തിലുണ്ടായ നാശനഷ്ടങ്ങള് വിലയിരുത്തിവരികയാണ്. ഇറാന്റെ തിരിച്ചടിയില് ബുധനാഴ്ച രാവിലെ ഔദ്യോഗിക പ്രസ്താവന നടത്തുമെന്നും ട്രംപ് വ്യക്തമാക്കി. വൈറ്റ് ഹൗസില് തിരക്കിട്ട് ചര്ച്ചകള് പുരോഗമിക്കുകയാണ്. യുഎസ് സ്റ്റേറ്റ് സെക്രട്ടറി മൈക് പോംപിയോയും യുഎസ് പ്രതിരോധ സെക്രട്ടറി മാര്ക് എസ്പെറും വൈറ്റ് ഹൗസിലെത്തിയിരുന്നു.
ഇറാന് ആക്രമണത്തിന് പിന്നാലെ എണ്ണ വിലയും കുതിച്ചുയര്ന്നിട്ടുണ്ട്.
