ചൈനയില് പൊട്ടിപ്പുറപ്പെട്ട കൊറോണ വൈറസ് ബാധക്കെതിരെ ലോകം ജാഗ്രത പാലിക്കുമ്പോഴും വൈറസ് ബാധ കൂടുതല് രാജ്യങ്ങളിലേക്ക്. ശ്രീലങ്കയിലും കാനഡയിലും കംബോഡിയയിലും ജര്മ്മനിയിലും കൊറോണ വൈറസ് ബാധ റിപ്പോര്ട്ടു ചെയ്തു. സ്ഥിതിഗതികള് വിലയിരുത്താനായി ലോകാരോഗ്യ സംഘടനയുടെ ഡയറക്ടര് ജനറല് ചൈനയിലെത്തി. വൈറസ് ബാധയുടെ വ്യാപ്തി വലുതാണെന്നും രോഗികളെ ചികിത്സിക്കുന്ന ഡോക്ടര്മാരും കര്ശന മുന്കരുതല് സ്വീകരിക്കണമെന്നും ലോകാരോഗ്യ സംഘടന അറിയിച്ചു.
അതിനിടെ, ചൈനയില് വൈറസ് ബാധബാധിച്ച് മരിച്ചവരുടെ എണ്ണം 106 ആയി. ചൈനയിലെ ഹുബൈ പ്രവിശ്യയിലാണ് പുതുതായി 24 പേര് കൂടി മരണപ്പെട്ടത്. 1300 പേര്ക്കു കൂടി രോഗം സ്ഥിരീകരിച്ചു.ഇതോടെ ചൈനയില് 4174 പേര്ക്ക് കൊറോണ വൈറസ് ബാധ സ്ഥിരീകരിച്ചിട്ടുണ്ട്.
രോഗികളുമായി അടുത്ത് സമ്പര്ക്കം പുലര്ത്തിയ 32,799 പേര് നിരീക്ഷണത്തിലാണ്. ചൈനയിലെ എല്ലാ പ്രവിശ്യകളിലും വൈറസ് റിപ്പോര്ട്ടു ചെയ്തിട്ടുണ്ട്.
കൊറോണ വൈറസ് ബാധയുടെ പശ്ചാത്തലത്തില് ഇന്ത്യയുള്പ്പെടയുള്ള രാജ്യങ്ങളിലെ പൗരന്മാരെ ചൈനയില് നിന്ന് തിരിച്ചയക്കാന് നടപടികള് ഊര്ജിതമാവുകയാണ്. വുഹാന് നഗരത്തിലുള്ള ഇന്ത്യക്കാരെ ഒഴിപ്പിക്കാന് കേന്ദ്ര സര്ക്കാര് കഴിഞ്ഞ ദിവസം തീരുമാനിച്ചിരുന്നു. ദല്ഹിയില് ക്യാബിനറ്റ് സെക്രട്ടറിയുടെ അധ്യക്ഷതയില് ചേര്ന്ന ഉന്നത തല യോഗത്തിലാണ് തീരുമാനം. ഇന്ത്യക്കാരെ തിരിച്ചെത്തിക്കുന്നതിനായി എയര് ഇന്ത്യയുടെ ബി 747 വിമാനം അയക്കുമെന്നാണ് സൂചന.
വിവിധ രാജ്യങ്ങളില് കൊറോണ വൈറസ് ബാധിതരുടെ എണ്ണം വര്ധിക്കുന്ന സാഹചര്യത്തില് ല് രോഗബാധിത പ്രദേശത്തുനിന്ന് കേരളത്തിലേക്ക് 436 പേര് കഴിഞ്ഞദിവസംവരെ എത്തിയിട്ടുണ്ട്. ഇതില് 431 പേര് വിവിധ ആശുപത്രികളിലും അഞ്ചുപേര് വീടുകളിലും നിരീക്ഷണത്തിലാണ്. കൊറോണ വൈറസിനെ പ്രതിരോധിക്കാന് സംസ്ഥാന ആരോഗ്യവകുപ്പ് സജ്ജമാണെന്ന് ആരോഗ്യമന്ത്രി കെ.കെ ഷൈലജ അറിയിച്ചു.
കൊറോണ വൈറസ് ബാധ ശരീരത്തില് കടന്ന് 14 ദിവസത്തിനിടയിലാണ് വൈറസ് മറ്റുള്ളവരിലേക്ക് പടരുക. ഈ ഘട്ടത്തില് വൈറസ് ബാധയേറ്റയാള്ക്ക് രോഗലക്ഷണങ്ങള് കാണാത്തതിനാല് രോഗ വ്യാപനം തടയല് ദുഷ്കരമാണ്.
ജപ്പാന്, തായ്ലാന്ഡ്, ദക്ഷിണകൊറിയ, വിയറ്റ്നാം, സിങ്കപ്പൂര്, ഹോങ്കോങ്, ഫിലിപ്പീന്സ്, യു.എസ്, എന്നീ രാജ്യങ്ങളിലും രോഗം സ്ഥിരീകരിച്ചിട്ടുണ്ട്. തായ് ലന്ഡില് വൈറസ് നിയന്ത്രണ വിധേയമാണെന്ന് സര്ക്കാര് അറിയിച്ചു.
