വാഷിങ്ടണ് : അമേരിക്കന് പ്രസിഡന്റ് ഡൊണാള്ഡ് ട്രംപിന്റെ ഇന്ത്യാ സന്ദര്ശനം ഫ്രെബ്രുവരി 24-25 തീയതികളില് . ഇരു രാജ്യങ്ങളും തമ്മിലുള്ള നയതന്ത്ര ബന്ധം ശക്തിപ്പെടുത്താനാണ് ട്രംപിന്റെ ഇന്ത്യാ സന്ദര്ശനം. അമേരിക്കന് പ്രസിഡന്റ് ആയതിനു ശേഷം ഇതാദ്യമായാണ് ട്രംപ് ഇന്ത്യയിലെത്തുന്നത്. ട്രംപിനോടൊപ്പം അദ്ദേഹത്തിന്റെ ഭാര്യ മെലാനിയ ട്രംപും എത്തും. ഗുജറാത്തിലെത്തുന്ന ഇരുവരും ഗാന്ധി സ്മാരകങ്ങള് സന്ദര്ശിക്കുമെന്നാണ് റിപ്പോര്ട്ടുകള്.
'പ്രസിഡന്റ് ട്രംപ് ഫെബ്രുവരി 24 മുതല് 25 വരെ പ്രധാനമന്ത്രി നരേന്ദ്രമോദിയെ സന്ദര്ശിക്കാന് ഇന്ത്യയിലേക്ക് പോകും. ഈ യാത്ര യുഎസ്-ഇന്ത്യ തന്ത്രപരമായ പങ്കാളിത്തത്തെ കൂടുതല് ശക്തിപ്പെടുത്തുകയും അമേരിക്കന്, ഇന്ത്യന് ജനതകള് തമ്മിലുള്ള ദൃഢമായ ബന്ധത്തെ ലോകത്തിന് മുന്നില് ഉയര്ത്തിക്കാട്ടുകയും ചെയ്യും. ' വൈറ്റ് ഹൗസ് ട്വീറ്റിലൂടെ വ്യക്തമാക്കി.
ന്യൂഡല്ഹിയിലെത്തി പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച്ച നടത്തുന്ന ട്രംപ് അഹമ്മദാബാദും സന്ദര്ശിക്കുമെന്ന് വൈറ്റ് ഹൗസ് അറിയിച്ചു. സൗഹൃദ സന്ദര്ശനത്തെക്കുറിച്ച് മോദിയും ട്രംപും ടെലിഫോണില് സംസാരിച്ചുവെന്ന് വൈറ്റ് ഹൗസ് പ്രസ് സെക്രട്ടറി സ്റ്റെഫാനി ഗ്രിഷാം പറഞ്ഞു. സെപ്തംബറില് പ്രധാനമന്ത്രി നരേന്ദ്ര മോദി അമേരിക്ക സന്ദര്ശിച്ചിരുന്നു. മോദി ട്രംപിനെ സന്ദര്ശിച്ചപ്പോള് അദ്ദേഹത്തെ ഇന്ത്യയിലേക്ക് ക്ഷണിച്ചിരുന്നു. ഇതേ തുടര്ന്നാണ് അമേരിക്കന് പ്രസിഡന്റിന്റെ ഇന്ത്യന് സന്ദര്ശനവുമായി ബന്ധപ്പെട്ട ചര്ച്ചകള് സജീവമായത്.
മുന് അമേരിക്കന് പ്രസിഡന്റ് ബരാക് ഒബാമ രണ്ട് തവണ ഇന്ത്യ സന്ദര്ശിച്ചിരുന്നു. 2010ലും 2015ലുമാണ് ഒബാമ ഇന്ത്യയിലെത്തിയത്.
