ന്യൂയോര്ക്ക്: അമേരിക്കയില് കൊറോണ വൈറസ് ബാധിച്ച് നാല് മലയാളികള് കൂടി മരിച്ചു. കോഴഞ്ചേരി തെക്കേമന ലാലു പ്രതാപ് ജോസ്(64), ന്യൂയോര്ക്ക് ഹൈഡ് പാര്ക്കില് തൊടുപുഴ കരിങ്കുന്നം മറിയാമ്മ മാത്യു (80), ന്യൂയോര്ക്ക് റോക്ലാന്ഡില് തൃശൂര് സ്വദേശി ടെന്നിസണ് പയ്യൂര്(82), ടെക്സസില് കോഴിക്കോട് കോടഞ്ചേരി വേളംകോട് ഞാളിയത്ത് റിട്ട. ലഫ്. കമാന്ഡര് സാബു എന്. ജോണിന്റെ മകന് പോള് (21) എന്നിവരാണ് മരിച്ചത്.
കോഴഞ്ചേരി തെക്കേമന ലാലു പ്രതാപ് ജോസ് ഫിലാഡല്ഫിയയില് ഇന്നലെയാണ് മരിച്ചത്.ഇദ്ദേഹം മാര്ച്ച് 16 മുതല് ചികിത്സയിലായിരുന്നു. ന്യൂയോര്ക്ക് മെട്രോപൊളിറ്റന് ട്രാന്സിറ്റ് അതോറിറ്റി ട്രാന്സ്പോട്ട് കണ്ട്രോളറായി ജോലി ചെയ്യുകയായിരുന്നു. അമേരിക്കയിലെ മലയാളികളുടെ മരണം ഇതോടെ 15 കവിഞ്ഞു.
അതേസമയം അമേരിക്കയില് കൊറോണ വൈറസ്ബാധിതരുടെ എണ്ണം നാല് ലക്ഷത്തോളമായി. 12841പേര് മരിക്കുകയും ചെയ്തു. റെക്കോര്ഡ് മരണ നിരക്കാണ് 24 മണിക്കൂറിനിടെ രേഖപ്പെടുത്തിയത്. 1,970 ജീവനുകള് യുഎസില് കഴിഞ്ഞ 24 മണിക്കൂറിനിടെ കൊറോണ കവര്ന്നു. ഒരു ദിവസത്തിനിടെ മരിക്കുന്നവരുടെ എണ്ണത്തില് ഇത് റെക്കോര്ഡാണ്. ന്യൂയോര്ക്കില് മാത്രം 731 മരണമുണ്ടായിട്ടുണ്ട്. 33,331 പേരില് 24 മണിക്കൂറിനിടെ രോഗം എത്തിയിട്ടുണ്ട്. ഇതോടെ യുഎസിലെ മൊത്തം രോഗികളുടെ എണ്ണം നാല് ലക്ഷംകടന്നു.
കഴിഞ്ഞ അഞ്ചുദിവസം താഴ്ന്നിരുന്ന സ്പെയിനിലെ മരണനിരക്കില് ചൊവ്വാഴ്ച നേരിയ വര്ധനവ് ഉണ്ടായി. 704 മരണങ്ങള് സ്പെയിനില് റിപ്പോര്ട്ട് ചെയ്തു.ആകെ മരണം 14,045 ആയി. ഇറ്റലിയില് 604 മരണങ്ങളാണ് ചൊവ്വാഴ്ച രേഖപ്പെടുത്തിയത്. മൊത്തം മരണസംഖ്യ 17,127 ആയിട്ടുണ്ട്. ഇന്നലെ മാത്രം ഫ്രാന്സില് 1,417 പേര് മരിച്ചതോടെ അവിടെ ആകെ മരണം 10,328 ആയി.
