അസോസിയേഷന്‍

യുക്മ സാംസ്‌കാരിക വേദിയുടെ ആഭിമുഖ്യത്തില്‍, കോവിഡ് 19 ന് എതിരായ പ്രവര്‍ത്തനങ്ങള്‍ക്ക് മുന്‍ നിരയില്‍ നില്‍ക്കുന്ന ലോകം മുഴുവനുമുള്ള ആരോഗ്യ പ്രവര്‍ത്തകര്‍ക്ക് പിന്തുണയും ആദരവും അര്‍പ്പിച്ച് കൊണ്ടുള്ള ലൈവ് ടാലന്റ് ഷോയില്‍ നാളെ (ചൊവ്വ) വൈകിട്ട് 5ന് (ഇന്‍ഡ്യന്‍ സമയം രാത്രി 9.30) ലണ്ടനില്‍ നിന്നുള്ള 14 കാരന്‍ അനുഷ് ഹൈദ്രോസും സഹോദരി 8 വയസുകാരി അന്യ ഹൈദ്രോസും എത്തുന്നു. ബിബിസി 1 ലെ സുപ്രസിദ്ധ ഷോ മൈക്കിള്‍ മക്കിന്റയേഷ്‌സ് 'ബിഗ് ഷോ' 2017 ലെ അപ്രതീക്ഷിത താരം, 2018-ല്‍ ലണ്ടന്‍ വെസ്റ്റ് എന്‍ഡ് ഷാഫ്റ്റ്‌സ്ബറി തീയേറ്ററിലെ 'മോടൌണ്‍ ദി മ്യൂസിക്കല്‍' ഷോയില്‍ യങ് മൈക്കിള്‍ ജാക്‌സന്റെ റോള്‍, വീണ്ടും 2019-ല്‍ BBC 1 ലെ മൈക്കിള്‍ മക്കിന്റയേഷ്‌സ് ഷോ 'ബിഗ് സര്‍പ്രൈസ്' ആര്‍ട്ടിസ്റ്റ്, CBBC ന്യൂസ് റൌണ്ട്, Cee bee bees റേഡിയോ ഷോകള്‍, യുക്മ റീജിയണല്‍, നാഷണല്‍ കലാമേള വേദികള്‍, 2015 ഏഷ്യാനെറ്റ് യൂറോപ്പ് ടാലന്റ് കണ്‍ടസ്റ്റ് തുടങ്ങി നൂറ് കണക്കിന് വേദികളിലെ വിജയതാരം അനുഷിനോടൊപ്പം നല്ലൊരു ഗായികയും പിയാനിസ്റ്റുമായ സഹോദരി അന്യയും നാളെ (യു കെ സമയം 5 PM ന്) (ഇന്‍ഡ്യന്‍ സമയം രാത്രി 9.30) പ്രേക്ഷകരെ സംഗീത സാഗരത്തിലാറാടിക്കുവാന്‍ എത്തുകയാണ്.

തന്റെ മൂന്നാമത്തെ വയസ്സില്‍ വേദിയില്‍ പാടാന്‍ തുടങ്ങിയ അനുഷ് അഞ്ചാം വയസ്സ് മുതല്‍ വയലിന്‍ പഠനമാരംഭിച്ചു. ആറ് വയസ്സുള്ളപ്പോള്‍ പ്രസിദ്ധ ഗായിക എമേലി സാന്‍ഡിന്റെ 'Reed all about it' എന്ന ഗാനം പാടി വിമ്പിള്‍ഡണ്‍ കോളേജ് വേദിയെ കീഴടക്കിയ അനുഷ് കൂടുതല്‍ വലിയ വേദികളിലേക്കുള്ള തന്റെ ജൈത്രയാത്ര അവിടെ തുടങ്ങുകയായിരുന്നു. 2017, 2019 വര്‍ഷങ്ങളില്‍ BBC 1 ലെ മൈക്കിള്‍ മക്കിന്റയര്‍ ഷോകളില്‍ പങ്കെടുക്കാന്‍ അവസരം ലഭിച്ച അനുഷിന്റെ പ്രോഗ്രാം കണ്ടത് 7 മില്യനിലധികം പ്രേക്ഷകരാണ്. കോവിഡ് 19 മഹാമാരിയില്‍ പെട്ട് വിഷമിക്കുന്ന തങ്ങളുടെ അയല്‍ക്കാര്‍ക്ക് വേണ്ടി വീടിന് മുന്നില്‍ നിന്ന് പാടിയ 'Heal the world' എന്ന ഗാനം ഒരു അയല്‍വാസി ഫേസ്ബുക്കില്‍ പോസ്റ്റ് ചെയ്തത് മൂന്ന് ദിവസത്തിനകം മൂന്ന് മില്യന്‍ ആളുകളാണ് കണ്ടത്. പാടുന്നതോടൊപ്പം പിയാനോയും വളരെ ഭംഗിയായി കൈകാര്യം ചെയ്യുന്ന അന്യ, അനുഷിനോടൊപ്പം ചേരുമ്പോള്‍ 'LET'S BREAK IT TOGETHER' പ്രേക്ഷകരെ ആനന്ദ നടനമാടിക്കുവാന്‍ കഴിയുമെന്നുള്ള കാര്യം നിസ്സംശയം പറയാം. Ewell Castle School ലെ ഇയര്‍ 9 വിദ്യാര്‍ത്ഥിയാണ് അനുഷ്. അന്യ ബ്രൂക്ക് ഫീല്‍ഡ് പ്രൈമറി സ്‌കൂളില്‍ ഇയര്‍ 4 ലും പഠിക്കുന്നു. സൌത്ത് ഈസ്റ്റ് റീജിയണില്‍ ലണ്ടനിലെ വോക്കിംഗ് മലയാളി അസ്സോസ്സിയേഷന്‍ അംഗങ്ങളായ ഡോ.സുഹാസ് ഹൈദ്രോസിന്റേയും സിനുവിന്റേയും മക്കളാണ് ഈ കൊച്ച് താരങ്ങള്‍.

വളരെ ചെറിയ പ്രായത്തില്‍ തന്നെ തങ്ങളുടെ മാന്ത്രിക പ്രകടനങ്ങളിലൂടെ ദശലക്ഷക്കണക്കിന് പ്രേക്ഷകരുടെ പ്രിയങ്കരരായി മാറിയ അനുഷ്, അന്യ സഹോദരങ്ങളുടെ, വയലിന്റേയും പിയാനോയുടേയും അകമ്പടിയോടെയുള്ള അതുല്യ പ്രകടനം ആസ്വദിക്കുവാന്‍ മുഴുവന്‍ മലയാളി കലാസ്വാദകരേയും യുക്മ സാംസ്‌കാരിക വേദിയുടെ ലൈവ് ടാലന്റ് ഷോ 'LET'S BREAK IT TOGETHER' ലേക്ക് ഹൃദയപൂര്‍വ്വം ക്ഷണിക്കുകയാണ്.

കോവിഡ് - 19 രോഗബാധിതര്‍ക്കു വേണ്ടി സ്വന്തം ജീവന്‍പോലും തൃണവല്‍ഗണിച്ച് കരുതലിന്റെ സ്‌നേഹസ്പര്‍ശമായി, വിശ്രമരഹിതരായി യു കെ യിലെ എന്‍ എച്ച് എസ് ഹോസ്പിറ്റലുകളിലും കെയര്‍ഹോമുകളിലും ജോലി ചെയ്യുന്ന ആരോഗ്യ പ്രവര്‍ത്തകര്‍ ഉള്‍പ്പെടെ ലോകത്തിലെ മുഴുവന്‍ ആരോഗ്യ മേഖലകളിലും പ്രവര്‍ത്തിക്കുന്നവര്‍ക്ക് ആദരവ് അര്‍പ്പിച്ചുകൊണ്ട് യുക്മ സാംസ്‌കാരിക വേദിയുടെ ആഭിമുഖ്യത്തില്‍ സംഘടിപ്പിക്കുന്ന ഈ ലൈവ് ഷോ യുക്മയുടെ ഔദ്യോഗീക ഫേസ്ബുക്ക് പേജ് ആയ UUKMA യിലൂടെയാണ് സംപ്രേക്ഷണം ചെയ്യുന്നത്.

എട്ടു വയസ്സു മുതല്‍ 21 വയസ്സ് വരെയുള്ള യു കെ യിലെ വൈവിധ്യമാര്‍ന്ന കലാവാസനയുള്ള പ്രതിഭകളെയും ലോകത്തിന്റെ വിവിധ ഭാഗങ്ങളില്‍ പ്രശസ്തരായ കുട്ടികളെയും പങ്കെടുപ്പിച്ച് നടത്തുന്ന ഈ കലാവിരുന്ന് ആരോഗ്യ പ്രവര്‍ത്തകര്‍ക്ക് കൃതജ്ഞതയും അഭിവാദ്യവും അര്‍പ്പിക്കുന്നതിനായാണ് സംഘടിപ്പിച്ചിരിക്കുന്നത്. വ്യത്യസ്തമായ സംഗീതോപകരണങ്ങളില്‍ കലാവിരുത് പ്രകടിപ്പിക്കുവാന്‍ കഴിവുള്ള പ്രതിഭകളുടെ കലാപ്രകടനങ്ങളാണ് ഈ ലൈവ് ഷോയുടെ പ്രധാന ആകര്‍ഷണം. എന്നാല്‍ ഹാസ്യാത്മകമായ പരിപാടികള്‍ ഉള്‍പ്പെടെ വൈവിധ്യമാര്‍ന്നതും ആകര്‍ഷണങ്ങളുമായ മറ്റു കലാപരിപാടികള്‍ അവതരിപ്പിക്കുവാനുള്ള അവസരവും ഉണ്ടായിരിക്കുന്നതാണ്.

യുകെയിലെ അറിയപ്പെടുന്ന ഗായകനായ റെക്‌സ് ബാന്‍ഡ് യു കെ യുടെ റെക്‌സ് ജോസും, ജെ ജെ ഓഡിയോസിന്റെ ജോജോ തോമസും ചേര്‍ന്ന് പരിപാടികള്‍ അവതരിപ്പിക്കുന്നവര്‍ക്ക് വേണ്ട സാങ്കേതിക സഹായങ്ങള്‍ നല്‍കുന്നതാണ്. കലാപരിപാടികള്‍ അവതരിപ്പിക്കുന്നതിനുവേണ്ട മിനിമം സമയം ഇരുപത് മിനിറ്റ് ആണ്. പരിപാടികള്‍ അവതരിപ്പിക്കുവാന്‍ ആഗ്രഹിക്കുന്ന എട്ടു മുതല്‍ ഇരുപത്തിയൊന്ന് വയസ്സ് വരെ പ്രായപരിധിയിലുള്ള കലാ പ്രതിഭകള്‍ അവതരിപ്പിക്കുവാന്‍ ആഗ്രഹിക്കുന്ന പരിപാടിയുടെ, കുറഞ്ഞത് അഞ്ച് മിനിറ്റ് ദൈര്‍ഘ്യം ഉള്ള വീഡിയോ ക്ലിപ്പ് 07846747602 എന്ന് വാട്‌സ്ആപ്പ് നമ്പറില്‍ അയച്ചു തരേണ്ടതാണ് . ഓര്‍ഗനൈസിംഗ് കമ്മിറ്റിയുടെ തീരുമാനം അനുസരിച്ച് പരിപാടികള്‍ അവതരിപ്പിക്കേണ്ടവരെ മുന്‍കൂട്ടി അറിയിക്കുന്നതുമായിരിക്കും.

ലോകമെമ്പാടുമുള്ള ആതുരസേവകര്‍ക്ക് ആദരവ് നല്‍കുന്നതിനായി യുക്മ സാംസ്‌കാരിക വേദിയുടെ ആഭിമുഖ്യത്തില്‍ പ്രതിഭാ സമ്പന്നരായ കുട്ടികള്‍ അവതരിപ്പിക്കുന്ന 'ലെറ്റ്‌സ് ബ്രേക്ക് ഇറ്റ് ടുഗദര്‍ ' എന്ന ലൈവ് കലാവിരുന്നിന് എല്ലാവിധ പ്രോത്സാഹനവും നല്‍കി വിജയിപ്പിക്കണമെന്ന് യുക്മ പ്രസിഡണ്ട് മനോജ്കുമാര്‍ പിള്ള, ജനറല്‍ സെക്രട്ടറി അലക്‌സ് വര്‍ഗീസ് വൈസ് പ്രസിഡന്റ് എബി സെബാസ്റ്റ്യന്‍ എന്നിവര്‍ അഭ്യര്‍ത്ഥിച്ചു.

യുക്മ സാംസ്‌കാരിക വേദി രക്ഷാധികാരി സി എ ജോസഫ് ദേശീയ കോര്‍ഡിനേറ്റര്‍ കുര്യന്‍ ജോര്‍ജ്, വൈസ് ചെയര്‍മാന്‍ ജോയി ആഗസ്തി, ജനറല്‍ കണ്‍വീനര്‍മാരായ ജയ്സണ്‍ ജോര്‍ജ്ജ്, തോമസ് മാറാട്ടുകളം എന്നിവരാണ് പരിപാടിയുടെ മേല്‍നോട്ടം വഹിക്കുന്നത്.

പ്രോഗ്രാം സംബന്ധമായ കൂടുതല്‍ വിവരങ്ങള്‍ക്ക് യുക്മ സാംസ്‌കാരിക വേദി രക്ഷാധികാരിയും, പരിപാടിയുടെ പ്രധാന ചുമതല വഹിക്കുന്നയാളുമായ സി എ ജോസഫ് (07846747602) , യുക്മ സാംസ്‌കാരിക വേദി നാഷണല്‍ കോര്‍ഡിനേറ്റര്‍ കുര്യന്‍ ജോര്‍ജ് (07877348602) എന്നിവരെ ബന്ധപ്പെടേണ്ടതാണ്.