കോട്ടയം : ഏഴു വര്ഷം മുന്പ് കോട്ടയം പള്ളിക്കത്തോട്ടില്നിന്ന് കാണാതായ ദമ്പതിമാരെ ആലപ്പുഴയില്നിന്ന് പോലീസ് കണ്ടെത്തി. കാഞ്ഞിരമറ്റം തോക്കാട് വടക്കേപ്പറമ്പില് ടോം തോമസ് (36), ഭാര്യ റീജ തോമസ് (32) എന്നിവരെയാണ് ഹോം സ്റ്റേ നടത്തിപ്പ് സ്ഥാപനത്തില് കണ്ടെത്തിയത്. കോടതിയില് ഹാജരാക്കിയശേഷം ഇവരെ വിട്ടയച്ചു. സാമ്പത്തികബാധ്യത മൂലമാണ് ഇവര് നാടുവിട്ടതെന്ന് പോലീസ് പറയുന്നു.
അടുത്തയിടെ ദമ്പതിമാരെ കണ്ടെത്തണമെന്ന് ആവശ്യപ്പെട്ട് ആഭ്യന്തരവകുപ്പ് സര്ക്കുലര് ഇറക്കിയിരുന്നു. ആലപ്പുഴയില് ഇവരെ കണ്ട ഒരാള് ഇക്കാര്യം പോലീസിന് നല്കി. കാണാതായ സംഭവത്തില് കേസുള്ളതിനാല് ഇരുവരെയും അറസ്റ്റ് ചെയ്ത് കോടതിയില് ഹാജരാക്കുകയായിരുന്നു.
പള്ളിക്കത്തോട് ബൈപ്പാസ് റോഡില് ഹോട്ടല് നടത്തിയിരുന്നു. നാടുവിട്ടശേഷം ആദ്യത്തെ 15 ദിവസം ചാലക്കുടിയിലെ ധ്യാനകേന്ദ്രത്തില് കഴിഞ്ഞു. ശേഷം ആലപ്പുഴയില് പരിചയക്കാരന്റെ ഉടമസ്ഥതയിലുള്ള നഗരത്തിലെ സ്ഥാപനം ഏറ്റെടുത്ത് നടത്തുകയായിരുന്നു. 25 മുറികളും ചെറിയ ഹട്ടുകളുമുള്ള സ്ഥാപനം വാടകയ്ക്ക് എടുത്ത് നടത്തുന്നതിനൊപ്പം ചെറിയ ഹോട്ടലും നടത്തിയിരുന്നു. എന്നാല് പോലീസ് സ്റ്റേഷനില് ഇവര്ക്കെതിരേ കാണാതായത് സംബന്ധിച്ച പരാതി മാത്രമേയുണ്ടായിരുന്നുള്ളൂവെന്ന് പോലീസ് അറിയിച്ചു.
