റാഞ്ചി: മന്ത്രിയാകാന് ഇന്ത്യയില് വിദ്യാഭ്യാസ യോഗ്യതയൊന്നും വേണ്ട. വിദ്യാഭ്യാസ മന്ത്രിയാകാനും അങ്ങനെ തന്നെ. ഇപ്പോഴിതാ ഒരു വിദ്യാഭ്യാസ മന്ത്രി 53-ാം വയസില് പ്ലസ് വണ് പ്രവേശനത്തിന് അപേക്ഷിച്ച് വാര്ത്തകളില് ഇടം നേടിയിരിക്കുകയാണ്. ജാര്ഖണ്ഡ് വിദ്യാഭ്യാസ മന്ത്രി ജഗര്നാഥ് മഹ്തോ ആണ് 11-ാം ക്ലാസ് പ്രവേശനത്തിന് അപേക്ഷിച്ചിരിക്കുന്നത്. വിദ്യാഭ്യാസമില്ലാത്ത മറ്റു മന്ത്രിമാരില് നിന്ന് ഭിന്നമായി അദ്ദേഹത്തിന് പഠിക്കണം എന്ന ആഗ്രഹം ഉള്ളത് തന്നെ വലിയ കാര്യമാണ്.
മന്ത്രി 25 വര്ഷത്തെ ഇടവേളയ്ക്ക് ശേഷമാണ് പഠനം പുനരാരംഭിക്കുന്നത്. ബൊക്കാറോയിലെ ദേവി മഹാതോ ഇന്റര് കോളേജിലാണ് മന്ത്രി പ്രവേശനത്തിനായി അപേക്ഷിച്ചിരിക്കുന്നത്. ഡുമ്രി നിയമസഭാ മണ്ഡലത്തില്നിന്നുള്ള എം.എല്.എയായ ജഗര്നാഥ് മഹ്തോ ആര്ട്സ് വിഭാഗത്തിലാണ് പ്രവേശനത്തിന് അപേക്ഷിച്ചിരിക്കുന്നത്.
നിരന്തരമായ വിമര്ശനങ്ങളാണ് വിദ്യാഭ്യാസം പുനരാരംഭിക്കാന് തീരുമാനിച്ചതിന് പിന്നിലെന്ന് അദ്ദേഹം പറഞ്ഞു. ഞാന് വിഭ്യാഭ്യാസ മന്ത്രിയായപ്പോള് മുതല് ആളുകള് എന്റെ വിദ്യാഭ്യാസ യോഗ്യതയെ ചോദ്യം ചെയ്യാന് തുടങ്ങിയെന്നും അദ്ദേഹം വ്യക്തമാക്കി.
ഒരു രാഷ്ട്രീയക്കാരനാണെന്നും അതിനാല്, പൊളിറ്റിക്കല് സയന്സ് വിഷയം ഉറപ്പായും തിരഞ്ഞടുക്കുമെന്ന് മന്ത്രി പറഞ്ഞു. ബാക്കി വിഷയങ്ങള് ഉടന് തന്നെ തിരഞ്ഞെടുക്കുമെന്നും അദ്ദേഹം കൂട്ടിച്ചേര്ത്തു.
1995-ലാണ് അദ്ദേഹം പത്താം ക്ലാസ് പരീക്ഷ പാസായത്. വിദ്യാഭ്യാസ കുറവുള്ള മറ്റു മന്ത്രിമാര്ക്കും ഇത് മാതൃകയാക്കാവുന്നതാണ്.
