താന് ഓഫീസ് വിട്ടിറങ്ങിയ ശേഷം യുഎസിന് ബഹുമാനം കിട്ടുന്നില്ലെന്ന് മുന് പ്രസിഡ ആന്റ് ഡൊണാള്ഡ് ട്രംപ്. രാജ്ഞിയുടെ സംസ്കാര ചടങ്ങില് 14 നിര പിന്നില് ഇരുന്ന ജോ ബൈഡനെയാണ് ട്രംപ് പരിഹസിച്ചത്. താനായിരുന്നു പ്രസിഡന്റെങ്കില് 2000 പേരുടെ സദസില് മുന്നിരയില് തന്നെ ഇരിപ്പിടം നേടുമായിരുന്നുവെന്നാണ് ട്രംപിന്റെ വാദം.
വെസ്റ്റ്മിന്സ്റ്റര് ആബെയില് പോളിഷ് പ്രസിഡന്റിന് പിന്നില് ഇരുന്ന ബൈഡന്റെ സ്ഥാനം ട്രംപ് ചോദ്യം ചെയ്തു. അമേരിക്കയോട് യാതൊരു ബഹുമാനവും ഇല്ലെന്നാണ് ഇതില് നിന്നും വ്യക്തമാകുന്നതെന്ന് ഡൊണാള്ഡ് ട്രംപ് വിമര്ശിച്ചു. ചില മൂന്നാം ലോകരാജ്യങ്ങളിലെ നേതാക്കളെ പരിചയപ്പെടാനാണ് ബൈഡന് ഈ അവസരത്തില് സാധിച്ചതെന്നും ട്രംപ് പരിഹസിച്ചു.
ബ്രിട്ടന്റെ സിംഹാസനത്തില് ഏറ്റവും കൂടുതല് കാലം ഇരുന്ന രാജ്ഞിയുടെ സംസ്കാര ചടങ്ങിലേക്ക് ട്രംപിന് ക്ഷണം ലഭിച്ചിരുന്നില്ല. വിവിധ രാജ്യങ്ങളിലെ നിലവിലെ ഭരണാധികാരികള്ക്ക് മാത്രമായി ക്ഷണം പരിമിതപ്പെടുത്തിയിരുന്നു.
'ഇതാണ് വെറും രണ്ട് വര്ഷം കൊണ്ട് അമേരിക്കയ്ക്ക് സംഭവിച്ചത്. ഒരു ബഹുമാനവുമില്ല! നമ്മുടെ പ്രസിഡന്റിന് ചില മൂന്നാം ലോക രാജ്യങ്ങളിലെ നേതാക്കളെ പരിചയപ്പെടാന് സമയം കിട്ടി. ഞാനാണ് പ്രസിഡന്റെങ്കില് എന്നെ അത്രയും പിന്നില് ഇരുത്തുമായിരുന്നില്ല. നമ്മുടെ രാജ്യം ഇപ്പോഴത്തേതില് നിന്നും ഏറെ വ്യത്യസ്തവുമാകുമായിരുന്നു', ട്രംപ് വിമര്ശിച്ചു.
