മാവേലിക്കര: മദ്യലഹരിയില്‍ പിതാവ് ആറ്‌ വയസുള്ള മകളെ പിതാവ് വെട്ടിക്കൊന്നു. മാവേലിക്കര പുന്നമൂട് ആനക്കൂട്ടില്‍ ശ്രീ ധന്യയില്‍ നക്ഷത്രയെയാണ് പിതാവ് മഹേഷ് മഴുവിന് തലയ്ക്ക് വെട്ടി കൊലപ്പെടുത്തിയത്. രാത്രി 7.30 ഓടെയാണ് സംഭവം. മദ്യലഹരിയില്‍ മഹേഷ് അവിടെ ഉണ്ടായിരുന്ന മകളുടെ തലയ്ക്ക് വെട്ടുകയായിരുന്നു. വെട്ടു കൊണ്ട കുട്ടി തല്‍ക്ഷണം മരിക്കുകയായിരുന്നു.
മഹേഷിന്റെ സഹോദരിയുടെ വീട്ടില്‍ താമസിക്കുന്ന അമ്മ സുനന്ദ(62) ബഹളംകേട്ട്‌ ഓടിച്ചെല്ലുമ്പോള്‍ വെട്ടേറ്റു സോഫയില്‍ കിടക്കുന്ന നക്ഷത്രയെയാണ് കണ്ടത്‌. പുറത്തേക്കോടിയ സുനന്ദയെ മഹേഷ് പിന്തുടരുകയും ആക്രമിക്കുകയും ചെയ്‌തു. സുനന്ദയുടെ തലയ്‌ക്കും കൈയ്‌ക്കും വെട്ടേറ്റിട്ടുണ്ട്‌. സുനന്ദ ജില്ലാ ആശുപത്രിയില്‍ ചികിത്സയിലാണ്‌. ബഹളംകേട്ട്‌ ഓടിയെത്തിയ സമീപവാസികളെ മഹേഷ് മഴുകാട്ടി ഭീഷണിപ്പെടുത്തുകയും ആക്രമിക്കാന്‍ ശ്രമിക്കുകയും ചെയ്‌തു.
നക്ഷത്രയുടെ അമ്മ വിദ്യ മൂന്നുവര്‍ഷം മുമ്പ്‌ ആത്മഹത്യ ചെയ്‌തിരുന്നു. വിദേശത്തായിരുന്ന മഹേഷ് പിതാവ് ശ്രീമുകുന്ദന്‍ ട്രെയിന്‍ തട്ടി മരിച്ചതിനെത്തുടര്‍ന്നാണ്‌ നാട്ടിലെത്തിയത്‌. മഹേഷിന്റെ പുനര്‍വിവാഹം വനിതാ കോണ്‍സ്‌റ്റബിളുമായി ഉറപ്പിച്ചിരുന്നു. എന്നാല്‍, ഇയാളുടെ സ്വഭാവവൈകൃതത്തെക്കുറിച്ച്‌ അറിഞ്ഞ വീട്ടുകാര്‍ വിവാഹത്തില്‍നിന്നു പിന്മാറുകയായിരുന്നു.
