സുപ്രീംകോടതിയിലെ ആദ്യ വനിതാ ജഡ്ജി ജസ്റ്റിസ് ആയിരുന്ന ജസ്റ്റിസ് ഫാത്തിമ ബീവി(96) അന്തരിച്ചു. കൊല്ലത്തെ സ്വകാര്യ ആശുപത്രിയില് വെച്ചായിരുന്നു അന്ത്യം. തമിഴ്നാട് ഗവര്ണര്, ദേശീയ മനുഷ്യാവകാശ കമ്മീഷന് അംഗം എന്നീ ചുമതലകള് വഹിച്ചിട്ടുണ്ട്.
1989 ഒക്ടോബര് 6-നാണ് ഫാത്തിമ ബീവി സുപ്രീംകോടതി ജഡ്ജിയായി നിയമനം നേടിയത്. 1992 ഏപ്രില് 29-ന് വിരമിച്ചു. പിന്നീട് ദേശീയ മനുഷ്യാവകാശ കമ്മീഷന് അംഗമായി. 1997 ജനുവരി 25 മുതല് 2001 ജൂലൈ 3-വരെ തമിഴ്നാട് ഗവര്ണറായി പ്രവര്ത്തിച്ചു.
അഴിമതിക്കേസില് ശിക്ഷിക്കപ്പെട്ട ജയലളിതയ്ക്ക് നിയമസഭാ തിരഞ്ഞെടുപ്പില് നാമനിര്ദേശ പത്രിക നിരസിക്കപ്പെട്ടെങ്കിലും മുഖ്യമന്ത്രിയാകാന് അനുവദിച്ചത് വിവാദമായി. പ്രതിപക്ഷ കക്ഷികളുടെ പ്രതിഷേധം കണക്കിലെടുത്ത് ഗവര്ണറെ തിരിച്ചു വിളിക്കാന് കേന്ദ്രം തീരുമാനിച്ചെങ്കിലും അതിന് മുന്പ് തന്നെ ഗവര്ണര് പദവി രാജി വയ്ക്കുകയായിരുന്നു.
1927 ഏപ്രില് 30-ന് പത്തനംതിട്ട ജില്ലയില് അണ്ണാവീട്ടില് മീര സാഹിബിന്റെയും ഖദീജ ബീവിയുടെയും മകളായിട്ടായിരുന്നു ജനനം. പത്തനംതിട്ട കത്തോലിക്കേറ്റ് സ്കൂളില് നിന്നും സ്കൂള് പഠനം പൂര്ത്തിയാക്കി. തിരുവനന്തപുരം യൂണിവേഴ്സിറ്റി കോളേജില് നിന്ന് ബിരുദം നേടിയതിന് ശേഷം തിരുവനന്തപുരം ലോ കോളേജില് നിന്ന് നിയമ ബിരുദം നേടി. 1950 നവംബര് 14ന് അഭിഭാഷകയായി എന് റോള് ചെയ്തു.
1958 ല് സബോര്ഡിനേറ്റ് മുന്സിഫായി നിയമനം നേടി. 1968 ല് സബോര്ഡിനേറ്റ് ജഡ്ജ് ആയി സ്ഥാനക്കയറ്റം നേടിയ ഫാത്തിമ ബീവി, 1972 -ല് ചീഫ് ജുഡീഷ്യല് മജിസ്ട്രേറ്റായി. 1974 -ല് ജില്ലാ സെഷന്സ് ജഡ്ജിയായി. 1983 ഓഗസ്റ്റ് 4-ന് കേരള ഹൈക്കോടതി ജഡ്ജിയായി നിയമിക്കപ്പെട്ടു. പിന്നീട് 1989 ഒക്ടോബര് 6-നാണ് ഫാത്തിമ ബീവി സുപ്രീംകോടതി ജഡ്ജിയായി നിയമനം നേടിയത്. 1992 ഏപ്രില് 29-ന് വിരമിച്ചു.
