ചെക്ക് റിപ്പബ്ലിക് തലസ്ഥാനമായ പ്രാഗിലെ ചാള്സ് യൂണിവേഴ്സിറ്റിയില് അക്രമിയുടെ വെടിയേറ്റ് പതിനഞ്ച് പേല്ര് കൊല്ലപ്പെട്ടു. ഡേവിഡ് കൊസാക് എന്ന 24 വയസുകാരനാണ് വെടിവെച്ചത്. പ്രാദേശിക സമയം ഉച്ചയ്ക്ക് 3.45 നായിരുന്നു സംഭവം. സ്വന്തം പിതാവിനെ കൊന്നശേഷമാണ് അക്രമി സര്വകലാശാലയിലേക്ക് കയറിവന്നത്.
താന് പഠിച്ചിരുന്ന യൂണിവേഴ്സിറ്റിയുടെ ആര്ട്സ് വിഭാഗത്തിലെ കെട്ടിടത്തിലേക്ക് തോക്കുമായി വന്ന അക്രമി കണ്ണില് കണ്ടവരെയെല്ലാം വെടിവെച്ചുവീഴ്ത്തുകയായിരുന്നു.
മുപ്പത്തിയാറോളം പേര്ക്ക് പരിക്കേറ്റിട്ടുണ്ട്. അക്രമിയുടെ വീട്ടില് നിന്നും ഡയറിക്കുറിപ്പുകള് കണ്ടെത്തിയിട്ടുണ്ട്. ‘ഞാന് ഒരു വലിയ കൂട്ടക്കൊല നടത്താന് പോവുന്നു’ എന്നാണ് ഡയറിയില് രേഖപ്പെടുത്തിയിട്ടുള്ളത്.
കെട്ടിടത്തില് ഇരച്ചുകയറി അക്രമിയെ കൊലപ്പെടുത്തിയിരുന്നില്ലെങ്കില് കൂടുതല് ഇരകള് ഉണ്ടാകുമായിരുന്നുവെന്ന് ആഭ്യന്തര മന്ത്രി വെളിപ്പെടുത്തി. ടെലിഗ്രാം ആപ്പില് 'സ്കൂളില് വെടിവെപ്പ് നടത്തിയ ശേഷം ആത്മഹത്യ ചെയ്യണം' എന്ന് ഇയാള് പോസ്റ്റ് ചെയ്തിരുന്നു. വെടിവെപ്പിന്റെ കാരണം ഇതുവരെ വ്യക്തമല്ല.
യൂറോപ്പിലെ തന്നെ ഏറ്റവും പഴക്കം ചെന്ന സര്വകലാശാലയില് ഒന്നാണ് പ്രാഗിലെ ചാള്സ് യൂണിവേഴ്സിറ്റി. അതേസമയം കഴിഞ്ഞ ആഴ്ച ഒരു കാടിന് സമീപത്ത് വെച്ച് ഒരു പിതാവും, കുഞ്ഞും വെടിയേറ്റ് മരിച്ച സംഭവത്തിന് പിന്നിലും കൊസാക്കാണെന്നാണ് പോലീസ് ഇപ്പോള് കരുതുന്നത്.
