കലിഫോര്ണിയയില് മലയാളി കുടുംബത്തിലെ കൂട്ടമരണം: ഭാര്യയെയും മക്കളെയും കൊന്ന് ഭര്ത്താവ് ജീവനൊടുക്കിയെന്ന് പൊലീസ്
കാലിഫോര്ണിയ: യുഎസിലെ കാലിഫോര്ണിയയിലെ സാന്മറ്റേയോയില് മരിച്ചനിലയില് കണ്ടെത്തിയ കൊല്ലം സ്വദേശികളുടെ മരണത്തില് വിശദീകരണവുമായി പോലീസ്. ഭാര്യയെയും ഇരട്ട മക്കളെയും കൊന്ന് ഭര്ത്താവ് ജീവനൊടുക്കിയെന്ന് പൊലീസ് വ്യക്തമാക്കി. 3 പേര് കൊല്ലപ്പെട്ടതാണെന്നും ഒരാള് ജീവനൊടുക്കിയതാണെന്നും യുഎസ് പൊലീസ് സ്ഥിരീകരിച്ചു.
കൊല്ലം സ്വദേശി ആനന്ദ് സുജിത് ഹെന്റി (42) ഭാര്യ ആലീസ് പ്രിയങ്ക യെ (40) വെടിവച്ചു കൊലപ്പെടുത്തിയ ശേഷം സ്വയം വെടിവച്ചു ജീവനൊടുക്കിയെന്നാണു പൊലീസ് പറയുന്നത്. 4 വയസ്സുള്ള ഇരട്ടക്കുട്ടികളായ നോഹയും നെയ്ഥനും കൊല്ലപ്പെട്ടത് എങ്ങനെയെന്നു പൊലീസ് വെളിപ്പെടുത്തിയിട്ടില്ല. വിഷമോ, കൂടിയ അളവില് മരുന്നുകളോ നല്കിയാകാം കുട്ടികളെ കൊലപ്പെടുത്തിയതെന്നാണു നിഗമനം. കുട്ടികളുടെ ശരീരത്തില് ക്ഷതമേറ്റതിന്റെ പാടുകളില്ലെന്നും പൊലീസ് പറഞ്ഞു.
ആനന്ദിന്റെയും ആലീസിന്റെയും മൃതദേഹം കുളിമുറിയില് നിന്നാണു കണ്ടെത്തിയത്. വെടിവച്ചതെന്നു കരുതുന്ന നിറതോക്കും അവിടെ നിന്നു ലഭിച്ചു. മക്കളുടെ മൃതദേഹങ്ങള് കിടപ്പുമുറിയിലായിരുന്നു. എന്തിനാണ് കൃത്യം നടത്തിയതെന്നു വെളിപ്പെടുത്തുന്ന ആത്മഹത്യാകുറിപ്പുകളോ, മറ്റു രേഖകളോ പൊലീസ് കണ്ടെത്തിയിട്ടില്ല. ആനന്ദിന്റെ വീട്ടില് നിന്നു വെടിയൊച്ച കേട്ടിരുന്നതായി സമീപവാസികള് പറഞ്ഞെന്നാണു പൊലീസ് പറയുന്നത്.
പ്രാദേശിക സമയം തിങ്കളാഴ്ച രാവിലെ 9.13-നാണ് സാന്മറ്റേയോ അലമേഡ ഡി ലാസ് പല്ഗാസിലെ വീട്ടിനുള്ളില് നാലുപേരെയും മരിച്ചനിലയില് കണ്ടെത്തിയതെന്നാണ് പോലീസ് പറയുന്നത്. രാവിലെ വീട്ടിലെത്തിയപ്പോള് ആരുടെയും പ്രതികരണമുണ്ടായില്ല. പരിശോധനയില് ബലംപ്രയോഗിച്ച് ആരെങ്കിലും വീടിനകത്ത് പ്രവേശിച്ചതിനും തെളിവ് കിട്ടിയില്ല. തുടര്ന്ന് അടച്ചിടാതിരുന്ന ജനല്വഴിയാണ് പോലീസ് സംഘം വീടിനകത്ത് കടന്നതെന്നും തുടര്ന്ന് നടത്തിയ പരിശോധനയിലാണ് നാലുപേരുടെയും മൃതദേഹങ്ങള് കണ്ടെത്തിയതെന്നും വാര്ത്താക്കുറിപ്പിലുണ്ട്. സംഭവത്തില് ക്രിമിനല് ഇന്വെസ്റ്റിഗേഷന് ബ്യൂറോ(സി.ഐ.ബി) അന്വേഷണം ഏറ്റെടുത്തതായും ഇതൊരു ഒറ്റപ്പെട്ട സംഭവമാണെന്നും പൊതുജനങ്ങള്ക്ക് അപകടസാധ്യതയില്ലെന്നും പോലീസ് അറിയിച്ചു.
കൊല്ലം ഫാത്തിമാമാതാ കോളജിലെ മുന് പ്രിന്സിപ്പല് പട്ടത്താനം വികാസ് നഗര് 57-ല് ഡോ.ജി.ഹെന്റിയുടെ മകനാണ് ആനന്ദ്. ഭാര്യ ആലീസ് കിളികൊല്ലൂര് സ്വദേശിനിയാണ്.
ഗൂഗിളില് ജോലിചെയ്യുകയായിരുന്ന ആനന്ദ് അടുത്തിടെയാണ് ജോലി രാജിവച്ച് സ്റ്റാര്ട്ടപ്പ് തുടങ്ങിയത്. ആലീസ് പ്രിയങ്ക സീനിയര് അനലിസ്റ്റായിരുന്നു. ആറ് വര്ഷങ്ങള്ക്ക് മുമ്പാണ് കുടുംബം അമേരിക്കയിലേക്ക് പോയത്. അതിനുശേഷം നാട്ടിലേക്ക് വന്നിട്ടില്ല. ആലീസിന്റെ അമ്മ ജൂലിയറ്റും ഇവര്ക്കൊപ്പം അമേരിക്കയിലായിരുന്നു.
ഞായറാഴ്ചയാണ് ജൂലിയറ്റ് അവിടെനിന്ന് നാട്ടിലേക്ക് തിരിച്ചത്. തിങ്കളാഴ്ച പുലര്ച്ചെ തിരുവനന്തപുരത്തെത്തി ആലീസിനെ വിളിച്ചിരുന്നു. അതിനുശേഷം ഇരുവരേയും ഫോണില് ബന്ധപ്പെടാന് കഴിഞ്ഞിട്ടില്ല. അവിടെയുള്ള സുഹൃത്തുക്കള് വഴി ആനന്ദിന്റെ വീട്ടില് അന്വേഷിച്ചെങ്കിലും വീട് തുറന്നില്ല. തുടര്ന്ന് പോലീസില് വിവരമറിയിക്കുകയായിരുന്നു.
