മറ്റു ഭാഷയിലുള്ളവര്ക്ക് മലയാള സിനിമയെ കുറിച്ചും ഇവിടുത്തെ സംഘടനകളെ കുറിച്ചും വലിയ മതിപ്പാണെങ്കിലും ഇവിടെ പലര്ക്കും അതില്ലെന്ന് നടന് മോഹന്ലാല്. സിനിമയിലെ സാങ്കേതിക പ്രവര്ത്തകരുടെ സംഘടനയായ ഫെഫ്കയുടെ തൊഴിലാളി സംഗമത്തില് സംസാരിക്കുകയായിരുന്നു അദ്ദേഹം. മലയാള സിനിമയിലെ വനിതാ കൂട്ടായ്മയായ ഡബ്ല്യുസിസിയെ ലക്ഷ്യമിട്ട് ഫെഫ്ക ജനറല് സെക്രട്ടറി ബി ഉണ്ണികൃഷ്ണന് നടത്തിയ വിമര്ശനത്തിന് പിന്നാലെയായിരുന്നു മോഹന്ലാലിന്റെ പരമാര്ശം.
'മറ്റു ഭാഷകളില് അഭിനയിക്കാന് പോകുമ്പോഴാണ് അവര്ക്ക് നമ്മളോടുള്ള മതിപ്പ് മനസ്സിലാവുക. മദിരാശിയില് സിനിമാ ഷൂട്ടിങ് നടന്നിരുന്ന കാലത്ത് ഒരുപാടുപേരുടെ ഒരുപാട് പ്രശ്നങ്ങള് നേരിട്ട് കണ്ടിട്ടുണ്ട്. അന്നൊന്നും സഹായത്തിന് സംഘടനകളില്ലായിരുന്നു. പലപ്പോഴും സംഘടനകളില് ചേരാന് പലരും വൈമുഖ്യം പ്രകടിപ്പിക്കാറുണ്ട്. അതു ഉപേക്ഷേിച്ച് ഇത് എന്റെ കൂടപ്പിറപ്പുകള്ക്കും സുഹൃത്തുക്കള്ക്കും സംഘടനയ്ക്കും വേണ്ടിയാണ് എന്ന ചിന്ത ഉണ്ടാവണം'- മോഹന്ലാല് പറഞ്ഞു.
കൊച്ചിയില് വെച്ചാണ് ഫെഫ്ക തൊഴിലാളി സംഗമ നടന്നത്. ഫെഫ്കയുടെ ഡയറക്ടേഴ്സ് യൂണിയനില് മോഹന്ലാല് അംഗത്വം സ്വീകരിച്ചു. സോഷ്യല്മീഡിയയിലൂടെ താരം തന്നെയാണ് ഇക്കാര്യം അറിയിച്ചത്. ചടങ്ങില് സത്യന് അന്തിക്കാട്, ഉര്വശി, ഇടവേള ബാബു, ജോജു ജോര്ജ്, സിബി മലയില്, രണ്ജി പണിക്കര്, സിദ്ദിഖ്, ബാലചന്ദ്രന് ചുള്ളിക്കാട് തുടങ്ങിയവര് സംസാരിച്ചു. മധു, കമല്ഹാസന്, അടൂര് ഗോപാലകൃഷ്ണന്, പൃഥ്വിരാജ് എന്നിവര് വീഡിയോ സന്ദേശങ്ങളിലൂടെ ആശംസയറിയിച്ചു. ബറോസ് എന്ന ചിത്രത്തിലൂടെയാണ് മോഹന്ലാല് സംവിധായകനായി അരങ്ങേറിയത്.
