റോയല് മെയില് വീണ്ടും വിവാദത്തില്. ഒറിജിനലെന്ന് കരുതി ജനം ഉപയോഗിക്കുന്ന ബാര്കോഡ് സ്റ്റാമ്പുകള് വ്യാജമാണെന്ന് അവകാശപ്പെട്ട് ഫൈന് അടിച്ചാണ് റോയല് മെയില് വിവാദത്തില്പെട്ടിരിക്കുന്നത്.
വ്യാജ സ്റ്റാമ്പാണെന്ന് അവകാശപ്പെട്ടാണ് നൂറുകണക്കിന് ബ്രിട്ടീഷുകാരില് നിന്നും തെറ്റായി ഫൈന് ഈടാക്കിയത്. സംഭവം വിവാദമായി മാറിയതടെ വിഷയം അന്വേഷിക്കാന് റോയല് മെയില് സമ്മതിച്ചു. കത്ത് ലഭിക്കുമ്പോള് സ്റ്റാമ്പ് വ്യാജമായതിനാല് 5 പൗണ്ട് ഫൈന് വേണമെന്ന് ആവശ്യപ്പെടുന്നതായാണ് ആളുകള് പരാതിപ്പെടുന്നത്. 2023 ജൂലൈയില് ബാര്കോഡ് അടങ്ങിയ സ്റ്റാമ്പിലേക്ക് മാറിയത് മുതലാണ് പ്രതിസന്ധി ഉടലെടുത്തത്.
അതേസമയം, വ്യാജമെന്ന് പറയുന്ന സ്റ്റാമ്പ് റോയല് മെയില് ഷോപ്പുകളില് നിന്നും നേരിട്ട് വാങ്ങിയതാണെന്നാണ് പോസ്റ്റ്മാസ്റ്റര്മാരും സമ്മതിക്കുന്നത്. ഇതോടെയാണ് സ്റ്റാമ്പ് വ്യാജമാണെന്ന വാദം തെറ്റാണെന്ന് കരുതുന്നത്. വിഷയത്തില് ഔദ്യോഗിക അന്വേഷണം ആരംഭിച്ചിട്ടില്ലെങ്കിലും റീട്ടെയിലര്മാരുമായി സംസാരിച്ച് പ്രശ്നത്തിന്റെ ഉറവിടം പരിശോധന നടത്തുന്നതായി റോയല് മെയില് മന്ത്രിമാരെ അറിയിച്ചു.
തങ്ങളുടെ സ്റ്റോറുകളില് നിന്നും വാങ്ങിയ സ്റ്റാമ്പുകള് തന്നെയാണ് വ്യാജമാണെന്ന് കണ്ടെത്തുന്നതെന്ന വിഷയമാണ് പോസ്റ്റ് ഓഫീസിനെയും ആശങ്കയിലാക്കുന്നത്. ജീവനക്കാരില് ആരെങ്കിലുമോ, പോസ്റ്റ്മാസ്റ്ററോ ആണ് ഒറിജിനല് സ്റ്റാമ്പിന് പകരം വ്യാജന് ഇറക്കുന്നതെന്നും സംശയിക്കുന്നു. കഴിഞ്ഞ വര്ഷം മുതല് ബാര്കോഡ് സ്റ്റാമ്പ് നിര്ബന്ധമായതോടെയാണ് വ്യാജ സ്റ്റാമ്പ് ആരോപണം ഉയരുന്നത്.
