സുരേഷ് ഗോപി കേന്ദ്രമന്ത്രിസഭയിലേക്ക്; ഡല്ഹിയില് പ്രധാനമന്ത്രിയെ കാണും
കേരളത്തില് ബിജെപിക്കായി അക്കൗണ്ട് തുടങ്ങിയ സുരേഷ് ഗോപി കേന്ദ്രമന്ത്രിസഭയിലേക്ക്. ഡല്ഹിലെത്തി പ്രധാനമന്ത്രിയെ അദ്ദേഹം കാണും. മൂന്നാം മോദി മന്ത്രിസഭയില് സുരേഷ് ഗോപിക്കു ക്യാബിനറ്റ് മന്ത്രിസ്ഥാനം ലഭിക്കുമെന്നാണ് സൂചന. തമിഴ്നാട്ടിലും ബിജെപിക്ക് എംപിമാരില്ല. അതേസമയം കേന്ദ്രമന്ത്രി സ്ഥാനം ബിജെപി നേതൃത്വം ആണ് തീരുമാനിക്കുകയെന്ന് സുരേഷ് ഗോപി പറഞ്ഞു. വ്യക്തിപരമായി മാത്രം കിട്ടിയ വോട്ടുകള് അല്ല തൃശൂരിലേതെന്നും സുരേഷ് ഗോപി. പാര്ട്ടി വോട്ടുകളും നിര്ണായകമായെന്നും വ്യക്തിപരമായ വോട്ടുകള് മാത്രം ആയിരുന്നെങ്കില് 2019ലെ താന് ജയിക്കുമായിരുന്നുവെന്നും അദ്ദേഹം പറഞ്ഞു.
പ്രചാരണ സമയത്ത് ആരെയും അധിക്ഷേപിച്ചിട്ടില്ലെന്നും സുരേഷ്ഗോപി പറഞ്ഞു. കെ മുരളീധരന്റെ അഭിപ്രായതോട് പ്രതികരിക്കാന് ഇല്ല. ഇതുവരെയും മുരളിയേട്ടന് എന്നാണ് വിളിച്ചിരുന്നതെന്നും ഇനിയും അങ്ങനെ തന്നെ വിളിക്കുമെന്നും സുരേഷ്ഗോപി പറഞ്ഞു. സിനിമ അഭിനയം തുടരുമെന്നും സുരേഷ് ഗോപി കൂട്ടിച്ചേര്ത്തു.
ലോക്സഭ തെരഞ്ഞെടുപ്പില് വിജയിച്ച ബിജെപി സ്ഥാനാര്ത്ഥി സുരേഷ് ഗോപിക്ക് തൃശൂരില് വന് സ്വീകരണമാണ് നല്കിയത്.
അതേസമയം ശനിയാഴ്ച മൂന്നാം മോദി സര്ക്കാരിന്റെ സത്യപ്രതിജ്ഞ ചടങ്ങ് നടത്താനാണ് ബിജെപി നീക്കം. സത്യപ്രതിജ്ഞ ചടങ്ങിലേക്ക് ലോക നേതാക്കള്ക്ക് ക്ഷണം ഉണ്ട്. ബംഗ്ലാദേശ്, ശ്രീലങ്ക, ഭൂട്ടാന്, നേപ്പാള്, മൗറീഷ്യസ് തുടങ്ങിയ രാജ്യങ്ങളിലെ നേതാക്കളെയാണ് സത്യപ്രതിജ്ഞ ചടങ്ങിലേക്ക് ക്ഷണിച്ചിരിക്കുന്നത്. ക്ഷണം ലഭിച്ചതായി ശ്രീലങ്കന് പ്രസിഡന്റ് റനില് വിക്രമസിംഗെയുടെ ഓഫീസിലെ മാധ്യമ വിഭാഗം അറിയിച്ചു. ബംഗ്ലാദേശ് പ്രധാനമന്ത്രി ഷെയ്ഖ് ഹസീനയെ നരേന്ദ്ര മോദി ഫോണില് വിളിച്ചതായി നയതന്ത്ര വൃത്തങ്ങള് അറിയിച്ചു. ഇതിന് പുറമേ നേപ്പാള് പ്രധാനമന്ത്രി പുഷ്പ കമാല് ദഹല് പ്രചണ്ഡ, ഭൂട്ടാന് പ്രധാനമന്ത്രി ഷെറിംഗ് ടോബ്ഗേ, മൗറീഷ്യസ് പ്രധാനമന്ത്രി പ്രവിന്ദ് ജുഗ്നാഥ് എന്നിവരെയും ഉടനെ ക്ഷണിക്കുമെന്നാണ് സൂചന. ഔപചാരിക ക്ഷണം ഇന്നുണ്ടാകുമെന്നാണ് പുറത്തുവരുന്ന റിപ്പോര്ട്ട്.
നാളെ പാര്ലമെന്റിലെ സെന്ട്രല് ഹാളില് ചേരുന്ന എന്ഡിഎ എംപിമാരുടെ യോഗത്തില് മോദിയെ പാര്ലമെന്റിലെ നേതാവായി തിരഞ്ഞെടുക്കും. നരേന്ദ്ര മോദിയെ എന് ഡി എ യോഗം നേതാവായി നിശ്ചയിച്ചത് ഏകകണ്ഠമായാണ് നേതാക്കള് അറിയിച്ചു. നരേന്ദ്ര മോദി സര്ക്കാര് രൂപികരിക്കുന്നതിനെ നിതീഷ് കുമാറും ചന്ദ്രബാബു നായിഡുവും പിന്തുണച്ചു. ഇക്കാര്യം വ്യക്തമാക്കി ഇരുവരുടെയും പാര്ട്ടികളായ ജെ ഡി യുവും ടി ഡി പിയും പിന്തുണ കത്ത് നല്കുകയും ചെയ്തു. ശിവസേനയടക്കമുള്ള പാര്ട്ടികളും പിന്തുണക്കത്ത് നല്കി.
