എന്നെ മോളേ എന്ന് വിളിച്ചിരുന്ന ആ പ്രധാന നടന് മോശമായി പെരുമാറി; പേര് ഉടന് വെളിപ്പെടുത്തും- സോണിയ തിലകന്
ഹേമ കമ്മീഷന് റിപ്പോര്ട്ടിന് പിന്നാലെ തനിക്കുണ്ടായ ദുരനുഭവം വെളിപ്പെടുത്തി അന്തരിച്ച നടന് തിലകന്റെ മകള് സോണിയ തിലകന്. തനിക്ക് സിനിമാക്കാരെ ഭയക്കേണ്ട കാര്യമുണ്ടായിരുന്നില്ലെന്നും കുടുംബത്തിലെ അംഗങ്ങളെ പോലെയാണ് എല്ലാവരെയും കണ്ടതെന്നും, തിലകന് മരിച്ചതിന് ശേഷം മലയാള സിനിമയിലെ ഒരു പ്രധാന നടന് തന്നെ വിളിച്ച് മോശമായി പെരുമാറാന് ശ്രമിച്ചെന്നും സോണിയ തിലകന് പറയുന്നു. പ്രധാന നടന്റെ പേര് ഉടന് തന്നെ താന് വെളിപ്പെടുത്തുമെന്നും സോണിയ കൂട്ടിചേര്ത്തു. സിനിമയ്ക്ക് പുറത്ത് നില്ക്കുന്ന താന് നേരിട്ടത് ഇത്രത്തോളം ആണെങ്കില് സിനിമയ്ക്കുള്ളിലെ സ്ത്രീകള് നേരിട്ടത് ഭീകരമായിരിക്കും എന്നും സോണിയ മാധ്യമങ്ങളോട് പ്രതികരിച്ചു.
അച്ഛന് പറഞ്ഞ അറിവാണുള്ളത്. 2010-ലാണ് അച്ഛന് ആദ്യമായി സിനിമയിലെ വിഷയങ്ങള് പുറത്തുപറയുന്നത്. അച്ഛനുമായുള്ള പ്രശ്നം നടക്കുന്ന സമയത്ത് സംഘടനയുടെ മീറ്റിങ് നടക്കുമ്പോള് ഏതാണ്ട് 62 ഗുണ്ടകളെ പുറത്ത് സജ്ജമാക്കി നിര്ത്തിയിരിക്കുകയായിരുന്നു. ഇതൊരു മാഫിയയാണെന്ന് അച്ഛന് പറഞ്ഞു. അന്ന് പലരും ഇത് മുഖവിലയ്ക്കെടുത്തില്ല. ഈ സംഘടനയുടെ ബൈലോ പ്രകാരം ഇക്കാര്യങ്ങള് പുറത്തുപറയാന് പാടില്ലെന്നാണ്. പക്ഷേ, അച്ഛന് അത് തുറന്ന് പറഞ്ഞു.
എനിക്ക് സിനിമാക്കാരെ ഭയം ഉണ്ടാകേണ്ട കാര്യമില്ല. കുട്ടിക്കാലം മുതല് അവരെ കാണുന്നവതാണ് ഞാന്. വീട്ടിലെ അംഗങ്ങളെപ്പോലെയാണ് പെരുമാറിയിരുന്നത്. വ്യക്തിപരമായ കാര്യങ്ങളെല്ലാം അച്ഛനുമായി അവര് സംസാരിക്കാറുണ്ടായിരുന്നു. പിന്നീട് ഈ പ്രശ്നം വന്നപ്പോള്, എല്ലാവരും ഒറ്റക്കെട്ടായി. ഒരു മേശയ്ക്ക് ചുറ്റുമിരുന്ന് സംസാരിച്ച് തീര്ക്കേണ്ട കാര്യമാണ് ഈ നിലയില് എത്തിച്ചത്. പുറത്താക്കാനും പീഡകര്ക്ക് കൂട്ടുനില്ക്കാനുമാണോ ഈ സംഘടന? ഹേമ കമ്മിറ്റി റിപ്പോര്ട്ടിന്റെ വെളിച്ചത്തില് സംഘടന പിരിച്ചുവിടുകയാണ് വേണ്ടത്. സര്ക്കാര് നടപടി സ്വീകരിക്കണം. ഒരാള് നല്ല ഷര്ട്ട് ഇട്ടു വന്നാല് പോലും ഈഗോ കാരണം പുറത്താക്കുന്നതടക്കമുള്ള സംഭവം ഉണ്ടായിട്ടുണ്ടെന്ന് അച്ഛന് പറഞ്ഞിട്ടുണ്ട്.
അച്ഛന് മരിച്ചതിന് ശേഷം ഒരു പ്രധാനനടന് എന്നെ വിളിച്ചു. അച്ഛനോട് ചെയ്ത കാര്യങ്ങളില് കുറ്റബോധമുണ്ട് എന്നൊക്കെ പറഞ്ഞിട്ട്. മോളേ എന്നൊക്കെ വിളിച്ച് ബഹുമാനത്തോടെയാണ് സംസാരിച്ചത്. പക്ഷേ പിന്നീട് എനിക്ക് വന്ന സന്ദേശങ്ങളില്നിന്ന് ഉദ്ദേശ്യം വേറെയാണെന്നു മനസ്സിലായി. സിനിമയുമായി ബന്ധമില്ലാത്ത എനിക്ക് വരെ ഈ അനുഭവമുണ്ടായി. ഞാന് അവരുടെ സുഹൃത്തിന്റെ മകളാണ്.
അച്ഛന് മരിച്ചതിന് ശേഷം സിനിമയില് സൗഹൃദങ്ങളൊന്നുമില്ല. വല്ലപ്പോഴും കണ്ടാല് സംസാരിക്കും. അച്ഛനോട് ചെയ്ത കാര്യങ്ങള് മനസ്സില്നിന്ന് അങ്ങനെ പോകില്ലല്ലോ. അച്ഛനെ സിനിമയില്നിന്ന് വിലക്കിയ ശേഷം സീരിയലിലും വിലക്കി. സിനിമയിലെ ഒരു നടനായിരുന്നു സീരിയലിന്റെ സംഘടനയുടെ തലപ്പത്ത്. ഇവര് ഒരു പതിനഞ്ച് പേരുണ്ട്. ഒരു ഹിഡന് അജണ്ട വച്ചാണ് അവര് പ്രവര്ത്തിക്കുന്നത്. പോക്സോ കേസ് പോലുള്ള ഗുരുതരമായ പ്രശ്നങ്ങള് ഹേമ കമ്മിറ്റി റിപ്പോര്ട്ടില് പറയുന്നു. കര്ശനമായി നിയമനടപടിയെടുക്കേണ്ട വിഷയമാണ്.' സോണിയ പറയുന്നു
