നടി ഹണി റോസിന്റെ പരാതിയില് രാഹുല് ഈശ്വറിനെതിരെ കേസെടുക്കാനാകില്ലെന്ന് പൊലീസ്. നടിയുടെ നിലവിലെ പരാതിയില് പൊലീസിന് കേസെടുക്കാന് വകുപ്പുകളില്ലെന്ന് പൊലീസ് വ്യക്തമാക്കി. ഹണി റോസിന് കോടതി വഴി പരാതി നല്കാമെന്നും കൊച്ചി പൊലീസ് അറിയിച്ചു. നടിയുടെ പരാതിയില് രാഹുല് ഈശ്വര് പ്രതിയല്ലെന്നും പൊലീസ് കോടതിയില് റിപ്പോര്ട്ട് നല്കി. രാഹുല് ഈശ്വറിന്റെ മുന്കൂര് ജാമ്യാേപേക്ഷയില് കോടതി പൊലീസിനോട് റിപ്പോര്ട്ട് തേടിയിരുന്നു. ഹര്ജി ഫയലില് സ്വീകരിച്ച ഹൈക്കോടതി ഈ മാസം 27 ന് പരിഗണിക്കുന്നതിനായി മാറ്റി വയ്ക്കുകയായിരുന്നു. പരാതിയുടെ സ്വഭാവമനുസരിച്ച് കോടതി മുഖാന്തരമാണ് കേസില് തുടര്നടപടി സ്വീകരിക്കാനാകുക. ഇക്കാര്യം ഹണി റോസിനോടും പൊലീസ് വ്യക്തമാക്കിയിട്ടുണ്ട്.
സാമൂഹിക മാധ്യമങ്ങളിലൂടെയും ചാനല് ചര്ച്ചകളിലൂടെയും തന്നെ അധിക്ഷേപിച്ചുവെന്നായിരുന്നു ഹണി റോസിന്റെ പരാതി. എറണാകുളം സെന്ട്രല് പൊലീസിലാണ് ഹണി റോസ് പരാതി നല്കിയത്. തൃശൂര് സ്വദേശിയും രാഹുലിനെതിരെ പരാതി നല്കിയിട്ടുണ്ട്. നടിയുടെ വസ്ത്രധാരണത്തെയടക്കം വിമര്ശിച്ച് രാഹുല് ഈശ്വര് രംഗത്തെത്തിയിരുന്നു. ഇതിന് ചുവടുപിടിച്ച് സാമൂഹ്യമാധ്യമങ്ങളില് ഹണി റോസിനെതിരെ വ്യാപക പ്രചാരണമുണ്ടായി. ഇത് ചൂണ്ടിക്കാണിച്ചാണ് ഹണി റോസ് നിയമ നടപടിയുമായി മുന്നോട്ട് പോയത്.
അതേസമയം, ഹണി റോസിനെ അധിക്ഷേപിച്ചിട്ടില്ലെന്നായിരുന്നു രാഹുല് ഈശ്വറിന്റെ വാദം. വെള്ളിയാഴ്ച സംസ്ഥാന യുവജന കമ്മീഷന് രാഹുല് ഈശ്വറിനെതിരെ കേസെടുത്തിരുന്നു. ദിശ എന്ന സംഘടന നല്കിയ പരാതിയെ തുടര്ന്നാണ് കേസെടുത്തത്.
