കൊല്ക്കത്ത ബലാത്സംഗക്കൊലയില് സഞ്ജയ് റോയിക്ക് മരണം വരെ ജയില്
കൊല്ക്കത്ത ആര്ജി കര് മെഡിക്കല് കോളേജിലെ ബലാത്സംഗ കൊലപാതക കേസിലെ ഏക പ്രതി സഞ്ജയ് റോയിക്ക് ജീവപര്യന്തം വിധിച്ച് കൊല്ക്കത്ത സീല്ഡ അഡീഷണല് സെഷന്സ് കോടതി. പ്രതി സഞ്ജയ് റോയ് മരണം വരെ ജയിലില് കഴിയണമെന്നാണ് വിധി. 50,000 രൂപ പിഴയും വിധിച്ചു. കൊലപാതകം, ബലാത്സംഗം, മരണകാരണമായ ആക്രമണം തുടങ്ങിയ കുറ്റങ്ങളിലാണ് ശിക്ഷ വിധിച്ചത്. കേസ് അപൂര്വങ്ങളില് അപൂര്വമല്ലെന്നാണ് കോടതി വിധിച്ചത്.
കേസ് അപൂര്വങ്ങളില് അപൂര്വമാണെന്നും സഞ്ജയ് റോയിക്ക് വധശിക്ഷ വിധിക്കണമെന്നും കേസന്വേഷിച്ച സിബിഐ കോടതിയില് ആവശ്യപ്പെട്ടിരുന്നു. താന് തെറ്റൊന്നും ചെയ്തിട്ടില്ലെന്നും തന്നെ കുടുക്കിയതാണെന്നുമാണ് ഇപ്പോഴയും സഞ്ജയ് റോയ് വാദിക്കുന്നത്.
2024 ഓഗസ്റ്റ് ഒന്പതിനായിരുന്നു രാജ്യത്തെ ഞെട്ടിച്ച ക്രൂരമായ കൊലപാതകം. 31കാരിയായ പിജി വിദ്യാര്ത്ഥിനിയെ ആര്ജി കര് മെഡിക്കല് കോളേജിലെ സെമിനാര് ഹാളില് കൊല്ലപ്പെട്ട നിലയില് കണ്ടെത്തുകയായിരുന്നു. ബലാത്സംഗത്തിന് ശേഷമാണ് വനിതാ ഡോക്ടര് കൊല്ലപ്പെട്ടതെന്ന് കണ്ടെത്തിയതോടെ സംസ്ഥാനത്തും രാജ്യമൊട്ടാകെയും പ്രതിഷേധം ഇരമ്പി. ഓഗസ്റ്റ് പത്താം തീയതി സഞ്ജയ് റോയിയെ പൊലീസ് അറസ്റ്റ് ചെയ്തു.
സുപ്രീംകോടതിയും ഹൈക്കോടതിയും നിര്ണായക ഇടപെടല് നടത്തിയ സംഭവത്തില് കൊലപാതകം നടന്ന് 5 മാസത്തിന് ശേഷമാണ് വിധി വന്നത്. സാക്ഷിപ്പട്ടികയില് 128 പേരുണ്ട്. സംഭവത്തെ തുടര്ന്ന് ബംഗാളില് തുടങ്ങിയ ഡോക്ടര്മാരുടെ പ്രക്ഷോഭം രാജ്യമാകെ വ്യാപിച്ചിരുന്നു. പ്രതിക്ക് തൂക്കുകയര് ഉറപ്പാക്കുമെന്ന് മുഖ്യമന്ത്രി മമത ബാനര്ജി പറഞ്ഞിരുന്നു.
