സേവ് ദ ഡേറ്റിന്റെ മറവില് യുവതിയെ കുമരകത്തെത്തിച്ച് ഉപദ്രവിച്ചു: വിവാഹപിറ്റേന്ന് വധുവിനെ ഉപേക്ഷിച്ച് സ്വര്ണ്ണവുമായി വിദേശത്തേക്ക് മുങ്ങി
സേവ് ദ ഡേറ്റിന്റെ മറവില് യുവതിയെ കുമരകത്തെത്തിച്ച് ഉപദ്രവിച്ചശേഷം വിവാഹപിറ്റേന്ന് വധുവിനെ ഉപേക്ഷിച്ച് യുവാവ് സ്വര്ണ്ണവുമായി വിദേശത്തേക്ക് മുങ്ങിയതായി പരാതി റാന്നി സ്വദേശിയായ യുവാവിനെതിരെയാണ് യുവതിയുടെ വീട്ടുകാര് കടുത്തുരുത്തി പൊലീസില് പരാതി നല്കിയിരിക്കുന്നത്. വിവാഹത്തിന്റെ പിറ്റേദിവസം വധുവിനെ സ്വന്തം വീട്ടിലാക്കിയ ശേഷം ഇയാള് വിദേശത്തേക്ക് കടന്നുകളഞ്ഞെന്നാണ് പരാതി. യുവതിയുടെ സ്വര്ണവും ഇയാള് കൈക്കലാക്കിയെന്നും യുവതിയുടെ വീട്ടുകാര് ആരോപിക്കുന്നു.
ജനുവരി 23ന് ആയിരുന്നു യുവതിയെ റാന്നി സ്വദേശിയായ യുവാവ് വിവാഹം കഴിച്ചത്. അടുത്തദിവസം വധുവിനെ അവരുടെ വീട്ടിലാക്കിയശേഷം യുവാവ് കടന്നുകളഞ്ഞെന്നാണു പരാതി. പിന്നീട് അന്വേഷിച്ചപ്പോള് ഇയാള് വിദേശത്തേക്കു കടന്നതായി മനസ്സിലായെന്നു പരാതിയില് പറയുന്നു.
യുവതിയുടെ വീട്ടുകാരുടെ പരാതിയില് ഗാര്ഹിക പീഡനത്തിന് ഉള്പ്പെടെ പൊലീസ് കേസെടുത്തിട്ടുണ്ട്. ഇയാളെ നാട്ടിലെത്തിച്ചു ചോദ്യം ചെയ്താല് മാത്രമേ സംഭവത്തിന്റെ ദുരൂഹത അഴിയുകയുള്ളൂവെന്നു പൊലീസ് അറിയിച്ചു.
