സിനിമാലോകം ആവേശത്തോടെ കാത്തിരിക്കുന്ന എമ്പുരാന്റെ ട്രെയ്ലര് ആദ്യം കണ്ട് രജനികാന്ത് . സംവിധായകന് പൃഥ്വിരാജ് തന്നെയാണ് സിനിമാപ്രേമികളോട് പുതിയ വിശേഷം പങ്കുവച്ചത്. ട്രെയ്ലര് ആദ്യമായി കണ്ടത് രജനികാന്ത് ആണെന്നും അദ്ദേഹം പറഞ്ഞ വാക്കുകള് അമൂല്യമാണെന്നുമാണ് പൃഥ്വിരാജ് പറയുന്നത്. രജനികാന്തിനൊപ്പമുള്ള ചിത്രം പങ്കുവച്ചു കൊണ്ടാണ് പൃഥ്വിരാജിന്റെ സോഷ്യല് മീഡിയ പോസ്റ്റ്.
എമ്പുരാന് ട്രെയ്ലര് ആദ്യം കണ്ട ആള് രജനികാന്ത്, ട്രെയ്ലര് കണ്ടതിന് ശേഷം നിങ്ങള് പറഞ്ഞത് ഞാന് എപ്പോഴും ഓര്ക്കും! അത് എനിക്ക് മറക്കാന് സാധിക്കില്ല! ലോകം കീഴടക്കിയ സന്തോഷമുണ്ട്. രജനികാന്തിന്റെ കടുത്ത ആരാധകന്!” എന്നാണ് പൃഥ്വിരാജ് കുറിച്ചിരിക്കുന്നത്. അതേസമയം, ഇന്ന് വൈകിട്ട് 6 മണിക്ക് ചിത്രത്തിന്റെതായി അപ്ഡേറ്റ് ഉണ്ടാകുമെന്ന് അണിയറപ്രവര്ത്തകര് അറിയിച്ചിരുന്നു.
ഇത് ട്രെയ്ലര് അപ്ഡേറ്റ് ആയിരിക്കുമെന്ന് ഉറപ്പിച്ചിരിക്കുകയാണ് ആരാധകര്. മാര്ച്ച് 27ന് രാവിലെ 6 മണി മുതല് എമ്പുരാന്റെ ഷോ ആരംഭിക്കും. സിനിമയുടെ നിര്മ്മാണത്തില് നിന്നും ലൈക പ്രൊഡക്ഷന്സ് പിന്മാറിയിരുന്നു. പകരം ഗോകുലം ഗോപാലന്റെ ഉടമസ്ഥതയിലുള്ള ശ്രീ ഗോകുലം മൂവീസ് ലൈക്കയുടെ ഷെയര് ഏറ്റെടുത്തിട്ടുണ്ട്. സിനിമയുടെ റിലീസ് വൈകുമെന്ന വാര്ത്തകള് ഇതിനിടെ പ്രചരിച്ചിരുന്നു.
എന്നാല് റിലീസ് വൈകില്ലെന്ന് ചിത്രത്തിന്റെ സംവിധായകന് പൃഥ്വിരാജ് പുതിയൊരു പോസ്റ്റര് പങ്കുവച്ചു കൊണ്ട് വ്യക്തമാക്കിയിരുന്നു.
