സൗദി അറേബ്യയിലെ വിനോദസഞ്ചാര കേന്ദ്രമായ അല് ഉലയില് വാഹനങ്ങള് കൂട്ടിയിടിച്ച് പ്രതിശ്രുത വധൂവരന്മാരായ ലണ്ടന് മലയാളിയും പ്രതിശ്രുത വധുവും കൊല്ലപ്പെട്ടു. എന്ജിനീയറായ അഖില് അലക്സ്, മദീനയില് നഴ്സായ ടീന എന്നിവരാണ് മരിച്ചത്. ഇരുവരും വയനാട് സ്വദേശികളാണ്. ഇവരടക്കം അഞ്ചു പേരാണ് അപകടത്തില് മരിച്ചത്. അല് ഉല സന്ദര്ശിച്ച് മടങ്ങവേ 150 കിലോമീറ്റര് അകലെവെച്ചാണ് അപകടം.
മരിച്ചവരില് മൂന്നു പേര് സൗദി പൗരന്മാരാണെന്നാണ് പ്രാഥമിക വിവരം. ഇവര് സഞ്ചരിച്ച വാഹനവും എതിര്ദിശയിലെത്തിയ സൗദി സ്വദേശികളുടെ ലാന്ഡ്ക്രൂയിസറും കൂട്ടിയിടിച്ച് തീപ്പിടിക്കുകയായിരുന്നു. മൃതദേഹങ്ങള് കത്തിക്കരിഞ്ഞ നിലയിലാണെന്നാണ് പ്രാഥമികവിവരം.
സൗദിയില്നിന്നും ഒരുമിച്ച് നാട്ടിലെത്തി വിവാഹിതരാകാനിരിക്കെയാണ് ദുരന്തം. പ്രതിശ്രുതവരനായ അഖില് ലണ്ടനില്നിന്നു സൗദിയിലെത്തിയതായിരുന്നു. മദീനയിലെ കാര്ഡിയാക് സെന്ററില് നഴ്സായ ടീന നാട്ടിലേക്ക് പോകാനിരിക്കെയാണ് അപകടം. മൃതദേഹങ്ങള് അല് ഉലയിലെ മുഹ്സിന് ആശുപത്രിയില് സൂക്ഷിച്ചിരിക്കുകയാണ്.
