മാര്‍ച്ച് മാസം യുകെ പണപ്പെരുപ്പം 2.6% ആയി കുറഞ്ഞു. ഇതോടെ അടുത്ത മാസം പലിശ നിരക്ക് കുറയ്ക്കാന്‍ ബാങ്ക് ഓഫ് ഇംഗ്ലണ്ടിന് മേലുള്ള സമ്മര്‍ദം വര്‍ദ്ധിക്കും. ഏപ്രില്‍ മാസത്തിലെ വിവിധ ബില്ലുകള്‍ കുതിച്ചുയരുന്ന സാഹചര്യത്തില്‍ വിലക്കയറ്റം ദുര്‍ബലമായിരുന്നു.
ഉയര്‍ന്ന കൗണ്‍സില്‍ ടാക്‌സും, മറ്റ് സേവന ബില്ലുകളും, ഒപ്പം ഡൊണാള്‍ഡ് ട്രംപിന്റെ താരിഫ് യുദ്ധം സൃഷ്ടിക്കുന്ന അനിശ്ചിതാവസ്ഥയും ചേര്‍ന്നാണ് സ്ഥിതി ദുഷ്‌കരമാക്കുന്നത്. 2.7 ശതമാനം വരെ പ്രതീക്ഷിച്ച സ്ഥാനത്താണ് പണപ്പെരുപ്പം 2.6 ശതമാനത്തിലേക്ക് എത്തുന്നത്.
ജനുവരിയില്‍ 3 ശതമാനത്തിലേക്ക് ഉയര്‍ന്ന പണപ്പെരുപ്പം ഫെബ്രുവരി 2.8% ആയും കുറഞ്ഞിരുന്നു. കുറയുന്ന ഇന്ധന വിലയും, വിനോദങ്ങള്‍ക്കായുള്ള ചെലവ് വര്‍ദ്ധിക്കാത്തതും പണപ്പെരുപ്പം കുറയാന്‍ ഇടയാക്കിയെന്ന് നാഷണല്‍ സ്റ്റാറ്റിസ്റ്റിക്‌സ് ഓഫീസ് പറയുന്നു. ഫെബ്രുവരിയില്‍ പെട്രോള്‍ വില ശരാശരി ലിറ്ററിന് 1.6 പെന്‍സ് താഴ്ന്നിരുന്നു.
എന്നാല്‍ ഏപ്രില്‍ മുതല്‍ പണപ്പെരുപ്പം വീണ്ടും വര്‍ദ്ധിക്കുമെന്നാണ് കണക്കാക്കുന്നത്. സമ്മറില്‍ 4 ശതമാനത്തിലേക്ക് എത്തിയ ശേഷം അടുത്ത വര്‍ഷത്തോടെ മാത്രമാകും തിരിച്ചിറക്കം. അടുത്ത മാസം മോണിറ്ററി പോളിസി യോഗത്തില്‍ പലിശ നിരക്ക് വെട്ടിക്കുറയ്ക്കാന്‍ സാധ്യത തെളിയുന്നുണ്ട്. എന്നാല്‍ ശമ്പളവര്‍ദ്ധന കൂടി കണക്കിലെടുക്കുമ്പോള്‍ എത്രത്തോളം വരുമെന്നത് സംബന്ധിച്ച് സംശയമുണ്ട്.
