വിദേശ വിദ്യാര്ത്ഥികള്ക്കെതിരെ അമേരിക്കയിലെ ട്രംപ് സര്ക്കാര് അടുത്തിടെ സ്വീകരിച്ച നടപടികള്, ഇന്ത്യന് വിദ്യാര്ത്ഥികള്ക്കിടയില് കടുത്ത ആശങ്ക ഉയര്ത്തിയിട്ടുണ്ട്. അമേരിക്കന് ഇമിഗ്രേഷന് ലോയേഴ്സ് അസോസിയേഷന്റെ (AILA) റിപ്പോര്ട്ട് അനുസരിച്ച്, സംഘടന അടുത്തിടെ ശേഖരിച്ച 327 വിസ റദ്ദാക്കലുകളില് പകുതിയോളം ഇന്ത്യന് വിദ്യാര്ത്ഥികളുടേതാണ്. 'ഇന്റര്നാഷണല് സ്റ്റുഡന്റ്സിനെതിരെയുള്ള ഇമിഗ്രേഷന് എന്ഫോഴ്സ്മെന്റ് നടപടികളുടെ വ്യാപ്തി’ എന്ന തലക്കെട്ടിലുള്ള AILA സംഗ്രഹം, ഈ വിദ്യാര്ത്ഥികളില് 50 ശതമാനം ഇന്ത്യയില് നിന്നുള്ളവരാണെന്നും തുടര്ന്ന് 14 ശതമാനം ചൈനയില് നിന്നുള്ളവരാണെന്നും എടുത്തുകാണിക്കുന്നു. ഇന്ത്യയും ചൈനയും കൂടാതെ ദക്ഷിണ കൊറിയ, നേപ്പാള്, ബംഗ്ലാദേശ് എന്നിവ കൂടെ ലിസ്റ്റില് ഉള്പ്പെടുന്നു.
കഴിഞ്ഞ നാല് മാസമായി യുഎസ് സ്റ്റേറ്റ് ഡിപ്പാര്ട്ട്മെന്റും ഇമിഗ്രേഷന് ആന്ഡ് കസ്റ്റംസ് എന്ഫോഴ്സ്മെന്റും (ഐസിഇ) വിദേശ വിദ്യാര്ത്ഥികളുടെ ഡാറ്റ, അവരുടെ ആക്ടിവിസം ഉള്പ്പെടെയുള്ളവ, പരിശോധിച്ചുവരികയാണ്. ആര്ട്ടിഫിഷ്യല് ഇന്റലിജന്സ് ഉപയോഗിച്ചാണ് ഈ സ്ക്രീനിംഗ് നടത്തുന്നതെന്ന് ചിലര് ആരോപിക്കുന്നു. ഇത് ക്രിമിനല് ചരിത്രമോ ക്യാമ്പസ് പ്രതിഷേധങ്ങളുമായി ബന്ധമോ ഇല്ലാത്ത വിദ്യാര്ത്ഥികളെ തെറ്റായി ലക്ഷ്യം വയ്ക്കുന്നതിലേക്ക് നയിച്ചേക്കാം. മാര്ച്ചില്, സ്റ്റേറ്റ് സെക്രട്ടറി മാര്ക്കോ റൂബിയോ വിദ്യാര്ത്ഥി വിസ ഉടമകളെ തിരിച്ചറിയുന്നതിനും സ്ക്രീന് ചെയ്യുന്നതിനുമായി 'ക്യാച്ച് ആന്ഡ് റിവോക്ക്' പ്രോഗ്രാം പ്രഖ്യാപിച്ചു. അതില് ജൂതവിരുദ്ധതയ്ക്കോ പലസ്തീനികള്ക്കോ ഹമാസിനോ ഉള്ള പിന്തുണയ്ക്കോ തെളിവുകള്ക്കായി അവരുടെ സോഷ്യല് മീഡിയ നിരീക്ഷിക്കുന്നത് ഉള്പ്പെടുന്നു.
അന്താരാഷ്ട്ര വിദ്യാര്ത്ഥികളെയും എക്സ്ചേഞ്ച് പ്രോഗ്രാം സന്ദര്ശകരെയും ട്രാക്ക് ചെയ്യുന്നതിന് യുഎസ് ഡിപ്പാര്ട്ട്മെന്റ് ഓഫ് ഹോംലാന്ഡ് സെക്യൂരിറ്റി (DHS) ഉപയോഗിക്കുന്ന ഒരു പോര്ട്ടലാണ് സ്റ്റുഡന്റ് ആന്ഡ് എക്സ്ചേഞ്ച് വിസിറ്റര് ഇന്ഫര്മേഷന് സിസ്റ്റം (SEVIS). ICE പുറത്തിറക്കിയ ഒരു പ്രസ്താവന പ്രകാരം, SEVIS സിസ്റ്റത്തില് 4,736 അന്താരാഷ്ട്ര വിദ്യാര്ത്ഥികളുടെ വിസ സ്റ്റാറ്റസ് അവസാനിപ്പിച്ചു. അവരില് ഭൂരിഭാഗവും F1 വിസകള് കൈവശം വച്ചിരുന്നു. ഈ ഭരണപരമായ നടപടികളെ അഭൂതപൂര്വമായ ഒന്നാണെന്ന് AILA വിശേഷിപ്പിച്ചു. ഇത് വ്യവഹാരം ആവശ്യമായി വന്നേക്കാവുന്ന നിരവധി നിയമപരമായ ചോദ്യങ്ങള് ഉയര്ത്തുന്നു.
ഈ വിസ റദ്ദാക്കലുകളുടെ ആഘാതം വളരെ വലുതാണ്. 327 കേസുകളില് 50 ശതമാനവും ഓപ്ഷണല് പ്രാക്ടിക്കല് ട്രെയിനിംഗ് (OPT) ഉടമകളാണ്. F-1 വിസയിലുള്ള അന്താരാഷ്ട്ര വിദ്യാര്ത്ഥികള്ക്ക് 12 മാസം വരെ യുഎസില് ജോലി ചെയ്യാന് OPT അനുവദിക്കുന്നു. അവരുടെ വിസ റദ്ദാക്കിയതോടെ, ഈ വിദ്യാര്ത്ഥികള്ക്ക് ഇപ്പോള് ജോലി ചെയ്യാന് കഴിയില്ല. ഈ വിസ റദ്ദാക്കലുകള് ബാധിച്ച പ്രധാന സംസ്ഥാനങ്ങള് ടെക്സസ്, കാലിഫോര്ണിയ, ന്യൂയോര്ക്ക്, മിഷിഗണ്, അരിസോണ എന്നിവയാണ്.
