ലണ്ടന്‍: ഹൈ സ്ട്രീറ്റ് അതികായരായ ക്ലെയേഴ്‌സിന്റെ സ്റ്റോറുകള്‍ അടച്ചുപൂട്ടുന്നു. സ്റ്റോറുകള്‍ അടച്ചുപൂട്ടുന്നതിനുള്ള ഔദ്യോഗിക നടപടി ക്രമങ്ങള്‍ ഉടന്‍ ആരംഭിക്കും. 281 സ്റ്റോറുകളാണ് ഇവര്‍ക്കുള്ളത്. ഇവിടങ്ങളിലായി രണ്ടായിരത്തിലധികം പേര്‍ ജോലി ചെയ്തിരുന്നു.
കടകള്‍ അടച്ചു പൂട്ടുന്നതിന്റെ ഭാഗമായി ക്ലോസിംഗ് സെയിലിനും തുടക്കമായി. ബ്രിട്ടനിലെ ഈ ആക്‌സസറീസ് ഭീമന്‍ യുകെയിലെയും അയര്‍ലന്‍ഡിലെയും ബിസിനസിനായി അഡ്മിനിസ്ട്രേറ്റര്‍മാരെ നിയമിക്കുമെന്നും പ്രഖ്യാപിച്ചു.
യുകെയിലെ തങ്ങളുടെ സ്റ്റോറുകള്‍ പതിവുപോലെ തുറന്നിരിക്കുമെന്നും അഡ്മിനിസ്ട്രേറ്റര്‍മാരെ നിയമിക്കുന്നവരെ വരെ ജീവനക്കാര്‍ അവരുടെ സ്ഥാനങ്ങളില്‍ തുടരുമെന്നും കമ്പനി സ്ഥിരീകരിച്ചു. യുകെയിലും അയര്‍ലന്‍ഡിലുമായി ക്ലെയേഴ്‌സിന് ആകെ 306 സ്റ്റോറുകളുണ്ട്, കൂടാതെ അടുത്തിടെ വില്‍പ്പന ഇടിഞ്ഞത് ശൃംഖലക്ക് വലിയ തോതിലുള്ള തിരിച്ചടിയായി മാറിയിരുന്നു.
1961 ല്‍ സ്ഥാപിക്കപ്പെട്ട ഈ യു.എസ് റീട്ടെയിലറിന് കാനഡ, യുകെ, ഫ്രാന്‍സ്, സ്പെയിന്‍, ജര്‍മ്മനി, സൗദി അറേബ്യ, ഖത്തര്‍ എന്നിവിടങ്ങളിലും സ്റ്റോറുകളുണ്ട്. യുഎസ് ആസ്ഥാനമായുള്ള ക്ലെയേഴ്‌സ് ഗ്രൂപ്പ് കഴിഞ്ഞയാഴ്ച ഡെലവെയറിലെ ഒരു കോടതിയില്‍ പാപ്പരായി പ്രഖ്യാപിക്കണം എന്നാവശ്യപ്പെട്ട് ഹര്‍ജി നല്‍കിയിരുന്നു.
2018 ലാണ് കമ്പനി ഇത്തരത്തില്‍ ഒരു നീക്കം ആരംഭിച്ചത്. ജര്‍മ്മനിയിലും ഓസ്ട്രിയയിലും ഇത്തരത്തിലുള്ള പ്രത്യേക നടപടികള്‍ ഇതിനകം തന്നെ ആരംഭിച്ചിട്ടുണ്ട്. യുകെയില്‍ 281 സ്റ്റോറുകള്‍ ഉള്‍പ്പെടെ 17 രാജ്യങ്ങളിലായി 2,750 സ്റ്റോറുകള്‍ ഇപ്പോഴും പ്രവര്‍ത്തിക്കുന്നുണ്ട്.
