റാപ്പര് വേടനെതിരെ കൂടുതല് പേര് ലൈംഗികാതിക്രമ പരാതികളുമായി രംഗത്ത്. വേടന് ലൈംഗികാതിക്രമം നടത്തിയതായി വെളിപ്പെടുത്തി രണ്ട് യുവതികള് കൂടി രംഗത്തെത്തി. യുവതികള് മുഖ്യമന്ത്രിക്ക് പരാതി നല്കി. മുഖ്യമന്ത്രിയെ നേരിട്ട് കണ്ട് പരാതി ബോധിപ്പിക്കാന് സമയം തേടിയിട്ടുണ്ട്. ഗവേഷക വിദ്യാര്ത്ഥിനികളാണ് ലൈംഗികാതിക്രമം വെളിപ്പെടുത്തി പരാതി നല്കിയത്.
വേടന് ക്രൂരമായ ലൈംഗികാതിക്രമം നടത്തിയെന്നാണ് ഒരു യുവതിയുടെ പരാതി. ഗവേഷണാവശ്യത്തിന് വിവരം തേടി സമീപിച്ചപ്പോള് അതിക്രമം നടത്തിയെന്നാണ് മറ്റൊരു വിദ്യാര്ത്ഥിനി പരാതിയില് പറയുന്നത്. 2020-21 കാലഘട്ടത്തിലാണ് ലൈംഗികാതിക്രമം നടന്നതെന്നും പരാതിയില് പറയുന്നു.
വിവാഹ വാഗ്ദാനം നല്കി പീഡിപ്പിച്ചുവെന്ന യുവ ഡോക്ടറുടെ പരാതിയില് റാപ്പര് വേടന് എന്ന ഹിരണ്ദാസ് മുരളി ഒളിവിലാണ്. ഇയാള്ക്കെതിരെ പൊലീസ് ലുക്കൗട്ട് നോട്ടീസ് പുറത്തിറക്കിയിരുന്നു. 2021 ഓഗസ്റ്റ് മുതല് 2023 മാര്ച്ച് വരെ വിവിധ സ്ഥലങ്ങളില് വെച്ച് പീഡിപ്പിച്ചുവെന്നായിരുന്നു യുവതിയുടെ പരാതി. ഇന്സ്റ്റഗ്രാമിലൂടെയാണ് വേടനുമായി സൗഹൃദം ആരംഭിച്ചതെന്നും പരിചയത്തിനൊടുവില് കോഴിക്കോട്ടെ ഫ്ളാറ്റില് വെച്ച് വേടന് ബലാത്സംഗം ചെയ്തുവെന്നുമായിരുന്നു ഡോക്ടറുടെ മൊഴി.
2023-ലാണ് വേടന് തന്നെ ഒഴിവാക്കിയതെന്നും ഇരുവര്ക്കുമിടയില് സാമ്പത്തിക ഇടപാടുകള് ഉള്ളതായും യുവതി മൊഴി നല്കിയിരുന്നു. പൊലീസ് കേസ് രജിസ്റ്റര് ചെയ്തതിനു ശേഷം വേടന് എവിടെയാണ് എന്നതില് ആര്ക്കും വ്യക്തതയില്ല. വേടന്റെ സംഗീത ഷോകളും റദ്ദാക്കിയിരുന്നു. ഈ പരാതിയില് വേടന്റെ മുന്കൂര് ജാമ്യഹര്ജി ഹൈക്കോടതി ഇന്ന് പരിഗണിക്കും.
