ബി സുദര്ശന് റെഡ്ഡിയെ ഉപരാഷ്ട്രപതി സ്ഥാനാര്ത്ഥിയാക്കി 'ഇന്ത്യ' സഖ്യം
ന്യൂഡല്ഹി: ഡിഎംകെയെ ലക്ഷ്യമിട്ടു എന്ഡിഎ നടത്തിയ ചെക്കിന് ടിഡിപിയെ ലക്ഷ്യമിട്ടു മറു ചെക്ക്വച്ചു 'ഇന്ത്യ' സഖ്യം. തമിഴ്നാട്ടുകാരനായ സി.പി.രാധാകൃഷ്ണനെതിരെ തെലങ്കാനകാരനായ ജസ്റ്റിസ് ബി സുദര്ശന് റെഡ്ഡിയെ ഉപരാഷ്ട്രപതി തെരഞ്ഞെടുപ്പില് 'ഇന്ത്യ' സഖ്യം മത്സരിപ്പിക്കും. കോണ്ഗ്രസ് അധ്യക്ഷന് മല്ലികാര്ജ്ജുന് ഖര്ഗെ പ്രഖ്യാപനം നടത്തി. ഭരണഘടന സംരക്ഷിക്കാനുള്ള പോരാട്ടമാണെന്ന് സ്ഥാനാര്ത്ഥി പ്രഖ്യാപനത്തിന് ശേഷം ഖര്ഗെ പ്രതികരിച്ചു. ഐക്യകണ്ഠേനയാണ് ഇന്ത്യ സഖ്യം സുദര്ശന് റെഡ്ഡിയെ തിരഞ്ഞെടുത്തത്. അടുത്ത മാസം ഒമ്പതിനാണ് ഉപരാഷ്ട്രപതി തിരഞ്ഞെടുപ്പ്.
സുപ്രീംകോടതി മുന് ജഡ്ജിയായ സുദര്ശന് റെഡ്ഡി ഗോവയുടെ ആദ്യ ലോകായുക്ത കൂടിയാണ്. തമിഴ്നാട്ടില് നിന്നുള്ള സി പി രാധാകൃഷ്ണനെയാണ് എന്ഡിഎ ഉപരാഷ്ട്രപതി സ്ഥാനാര്ത്ഥിയായി പ്രഖ്യാപിച്ചത്. ഇതോടെ ദക്ഷിണേന്ത്യയില് നിന്നുള്ള രണ്ട് പേര് തമ്മിലായിരിക്കും ഉപരാഷ്ട്രപതി സ്ഥാനത്തേക്കുള്ള മത്സരം.
ആന്ധപ്രദേശിലെ കര്ഷക കുടുംബത്തില് ജനിച്ച സുദര്ശന് റെഡ്ഡി 1971 ലാണ് ഒസ്മാനിയ സര്വ്വകലാശാലയില് നിന്ന് നിയമ ബിരുദം പാസായത്. ആന്ധ്രപ്രദേശ് ഹൈക്കോടതിയില് പ്രക്ടീസ് ആരംഭിച്ച സുദര്ശന് റെഡ്ഡി 1988 ല് ഹൈക്കോടതിയില് സര്ക്കാര് പ്ലീഡറായും പിന്നീട് കേന്ദ്ര സര്ക്കാരിന്റെ അഡീഷണല് സ്റ്റാന്ഡിംഗ് കൗണ്സിലായും നിയമിക്കപ്പെട്ടു. 1993 ല് ആന്ധ്രപ്രദേശ് ഹൈക്കോടതി അഡീഷണല് ജഡ്ജായി ചുമതലയേറ്റെടുത്തു. 2005 ല് ഗുവാഹത്തി ഹൈക്കോടതി ചീഫ് ജസ്റ്റിസായ സുദര്ശന് റെഡ്ഡി 2007 ലാണ് സുപ്രീംകോടതി അഡീഷണല് ജഡ്ജായി ചുമതലയേറ്റത്. 2011ല് വിരമിച്ചു.
ഉപരാഷ്ട്രപതി സ്ഥാനാര്ത്ഥിയെ തീരുമാനിക്കാന് കോണ്ഗ്രസ് അധ്യക്ഷന് മല്ലികാര്ജ്ജുന് ഖര്ഗെയെ ഇന്ത്യ സഖ്യം ചുമതലപ്പെടുത്തുകയായിരുന്നു. രാഷ്ട്രീയക്കാരനല്ലാത്ത പൊതുസമ്മതനായ ആളെ സ്ഥാനാര്ത്ഥിയാക്കണം എന്ന നിര്ദേശമാണ് യോഗത്തില് ഉയര്ന്നത്. വിജയസാധ്യതയില്ലെങ്കിലും രാഷ്ട്രീയ മത്സരം വേണം എന്നതുതന്നെയാണ് പ്രതിപക്ഷത്തിന്റെ നിലപാട്.
