ഇനിയും പ്രകോപിപ്പിച്ചാല് പലതും തുറന്ന് പറയേണ്ടി വരും'; റിനി ആന് ജോര്ജ്
കെജെ ഷൈനിനെതിര നടന്ന സൈബര് ആക്രമണത്തില് പ്രതിഷേധിക്കാന് പറവൂരില് നടത്തിയ സിപിഎം പ്രതിഷേധ യോഗത്തില് പങ്കെടുത്തതില് പ്രതികരണവുമായി യുവനടി റിനി ആന് ജോര്ജ്. താന് ഒരു രാഷ്ട്രീയ പാര്ട്ടിയിലും അംഗമല്ലെന്നും സ്ത്രീപക്ഷ നിലപാട് ആര് പറഞ്ഞാലും യോജിക്കുമെന്നും റിനി ആന് ജോര്ജ് പറഞ്ഞു.
സ്ത്രീകള്ക്കെതിരായ സൈബര് അധിക്ഷേപത്തിന് എതിരെയായിരുന്നു കഴിഞ്ഞ ദിവസം നടന്ന പരിപാടി. സ്ത്രീപക്ഷ നിലപാട് ഉള്ളത് കൊണ്ടാണ് സിപിഎം പരിപാടിയില് പങ്കെടുത്തത്. കെ ജെ ഷൈനിന് ഐക്യദാര്ഢ്യം ആയിരുന്നില്ലെന്നും ഇനിയും ഇത്തരം പരിപാടികളില് പങ്കെടുക്കുമെന്നും റിനി ആന് ജോര്ജ് വ്യക്തമാക്കി. തെരഞ്ഞെടുപ്പില് മത്സരിക്കാന് ഉദ്ദേശിക്കുന്നില്ലെന്നും റിനി കൂട്ടിച്ചേര്ത്തു.
സിപിഎമ്മുമായി ഗൂഢാലോചന നടത്തി എന്ന് ചിലര് പ്രചരിപ്പിക്കുന്നുണ്ട്. ഇത്തരം ആരോപണം ഉന്നയിക്കുന്നവരെ തെളിയിക്കാന് വെല്ലുവിളിക്കുകയാണ്. ആരോപണം തെളിയിച്ചാല് ജീവിതം തന്നെ അവസാനിപ്പിക്കുമെന്നും റിനി പറഞ്ഞു. തനിക്കെതിരെ സൈബര് ആക്രമണം രൂക്ഷമാണ്. വിമര്ശനം ഉന്നയിക്കുന്നവരെ മുഴുവന് സിപിഎം ആക്കുകയാണെന്നും റിനി പറഞ്ഞു.
പ്രസ്ഥാനത്തെ സ്നേഹിക്കുന്നത് കൊണ്ടാണ് പലതും തുറന്ന് പറയാത്തത്. നേരിട്ടറിയുന്ന പലകാര്യങ്ങളും ഇതുവരെ പറഞ്ഞിട്ടില്ല. ഇനിയും പ്രകോപിപ്പിച്ചാല് പലതും തുറന്നു പറയേണ്ടി വരുമെന്നും അതിന്റെ പ്രത്യാഘാതം വലുതായിരിക്കുമെന്നും നടി മുന്നറിയിപ്പ് നല്കി. സിപിഎമ്മിലേക്ക് സ്വാഗതം ചെയ്യാന് കെ ജെ ഷൈനിന് സ്വാതന്ത്ര്യമുണ്ട്. അതില് തീരുമാനം എടുക്കേണ്ടത് താന് ആണ്. ഭാവിയില് സിപിഎമ്മില് ചേരുമോ എന്ന ചോദ്യം സങ്കല്പികം മാത്രമാണെന്നും റിനി ആന് ജോര്ജ് കൂട്ടിച്ചേര്ത്തു.
