സൂപ്പര്‍താരം രജനികാന്ത് തിങ്കളാഴ്ച ഉത്തരാഖണ്ഡിലെ പുണ്യസ്ഥലമായ ബദരീനാഥ് ധാമിലെത്തി. അടുത്ത മാസം ശൈത്യകാലത്തിനായി ക്ഷേത്രനട അടയ്ക്കാന്‍ തയ്യാറെടുക്കുന്നതിനിടെയാണ് അദ്ദേഹത്തിന്റെ സന്ദര്‍ശനം. രജനികാന്തിന്റെ സന്ദര്‍ശനം ശ്രീ ബദരീനാഥ്-കേദാര്‍നാഥ് ക്ഷേത്രസമിതി സ്ഥിരീകരിച്ചു.
ക്ഷേത്രത്തിലെത്തിയ രജനികാന്തിനെ ക്ഷേത്രസമിതി ഊഷ്മളമായി സ്വീകരിച്ചു. ഛാര്‍ ധാം തീര്‍ത്ഥാടന കേന്ദ്രങ്ങളിലൊന്നായ ബദരീനാഥ് ധാമില്‍, പ്രത്യേകിച്ച് ശൈത്യകാലത്ത് നട അടയ്ക്കുന്നതിന് മുമ്പായി ഓരോ വര്‍ഷവും ലക്ഷക്കണക്കിന് ഭക്തര്‍ എത്താറുണ്ട്. ക്ഷേത്രദര്‍ശനം നടത്തുന്ന നടന്റെ ചിത്രങ്ങളും വീഡിയോകളും ഇപ്പോള്‍ സോഷ്യല്‍ മീഡിയയില്‍ വൈറലാണ്.
ബദരീനാഥ് ധാം സന്ദര്‍ശനത്തിന് മുന്നോടിയായി രജനികാന്ത് സുഹൃത്തുക്കളോടൊപ്പം ഋഷികേശിലും എത്തിയിരുന്നു. വെള്ള കുര്‍ത്തയും മുണ്ടും ധരിച്ച നടന്‍ വഴിയോരത്ത് നിന്ന് ലളിതമായ ഭക്ഷണം ആസ്വദിക്കുന്ന ചിത്രം നേരത്തെ വൈറലായിരുന്നു.
