അടൂര്‍ ഗോപാലകൃഷ്ണനും മമ്മൂട്ടിയും വര്‍ഷങ്ങള്‍ക്ക് ശേഷം വീണ്ടും ഒന്നിക്കുന്നു. പദയാത്ര എന്നാണ് സിനിമയുടെ പേര്. മമ്മൂട്ടി കമ്പനി നിര്‍മിക്കുന്ന എട്ടാമത്തെ ചിത്രമാണിത്. ടൈറ്റില്‍ പ്രഖ്യാപനത്തിനോടൊപ്പം സിനിമയുടെ പൂജയും നടന്നു. പദയാത്ര ആരംഭിക്കുന്നു എന്നാണ് പോസ്റ്ററില്‍ കുറിച്ചിരിക്കുന്നത്.
തകഴിയുടെ പ്രസിദ്ധ നോവലായ രണ്ടിടങ്ങഴിയാണ് അടൂര്‍ സിനിമയാക്കാന്‍ ഒരുങ്ങുന്നതെന്ന് നേരത്തെ റിപ്പോര്‍ട്ടുകളുണ്ടായിരുന്നു. എന്നാല്‍, കഥയും തിരക്കഥയും സംഭാഷണവും അടൂര്‍ ഗോപാലകൃഷ്ണനും കെ വി മോഹന്‍കുമാറും ചേര്‍ന്ന് നിര്‍വഹിക്കുന്നു എന്നാണ് പോസ്റ്ററിലുള്ളത്.
മുഖ്യ സംവിധാന സഹായി മീരസാഹിബ്, ഛായാഗ്രഹണം ഷെഹ്നാദ് ജലാല്‍, ചിത്രസംയോജനം പ്രവീണ്‍ കുമാര്‍, കലാ സംവിധാനം ഷാജി നടുവില്‍, സംഗീത സംവിധാനം മുജീബ് മജീദ് തുടങ്ങിയവരാണ് അണിയ പ്രവര്‍ത്തകര്‍. പോസ്റ്റര്‍ ഡിസൈനിലും വാക്കുകളിലുമെല്ലാം പഴമ നിലനിര്‍ത്തിയിരിക്കുകയാണ്.
