മുഖ്യമന്ത്രി സ്റ്റാലിന്റെ നേതൃത്വത്തിലുള്ള ഡിഎംകെ സര്‍ക്കാറിനെ താഴെ ഇറക്കണമെന്ന് ടിവികെ നേതാവ് വിജയ്. ആരുടേയും അടിമയാകാന്‍ സമ്മര്‍ദമില്ല, ഒരു സമ്മര്‍ദത്തിനും വഴങ്ങില്ലെന്നും അദ്ദേഹം വ്യക്തമാക്കി. 'നടക്കാനിരിക്കുന്നത് വെറും ഒരു തെരഞ്ഞെടുപ്പ് മാത്രം അല്ല, ജനാധിപത്യ പോരാണ്. ആ പോര് മുന്നില്‍ നിന്ന് നയിക്കുന്ന കമാന്‍ഡോസാണ് നിങ്ങള്‍' മാമല്ലപുരത്ത് പാര്‍ട്ടി ഭാരവാഹികളുടെ യോഗത്തെ അഭിസംബോധന ചെയ്തുകൊണ്ട് വിജയ് പറഞ്ഞു.
തെരഞ്ഞെടുപ്പ് ഇനിയും മൂന്ന് മാസമാണ് ശേഷിക്കുന്നത്. ആ സമയത്തിനുള്ള നിങ്ങള്‍ നടത്തുന്ന പ്രവര്‍ത്തനത്തിലാണ് നമ്മുടെ വിജയം ഇരിക്കുന്നത്. നമ്മള്‍ നിര്‍ത്താന്‍ പോകുന്ന സ്ഥാനാര്‍ത്ഥികള്‍ക്ക് എല്ലാവിധ പിന്തുണയും നല്‍കണം. ടിവികെ ഒരിക്കലും അഴിമതി കാണിക്കില്ല, ജനങ്ങള്‍ക്ക് വേണ്ടി പ്രവര്‍ത്തിക്കുമെന്നും അദ്ദേഹം വ്യക്തമാക്കി.
രാഷ്ട്രീയത്തിലുള്ളവര്‍ അണ്ണയെ മറന്നുപോയി, പാര്‍ട്ടിയുടെ പേരില്‍ അണ്ണാ എന്ന് പേരുള്ളവരും ഉള്‍പ്പെടെ.' ഡിഎംകെയെയും പ്രധാന പ്രതിപക്ഷമായ എഐഎഡിഎംകെയെയും ലക്ഷ്യമിട്ട് വിജയ് പറഞ്ഞു, ഇതിനു മുന്‍പ് വന്നവരെപ്പോലെയോ ഇപ്പോള്‍ ഉള്ളവരെപ്പോലെയോ അഴിമതി നടത്തില്ലെന്നും ടിവികെ നേതാവ് പറഞ്ഞു. 'രാഷ്ട്രീയത്തില്‍ പ്രവേശിച്ചതിനു ശേഷമായാലും അധികാരത്തില്‍ വന്നതിനു ശേഷമായാലും, മുന്‍കാലങ്ങളിലെയും ഇപ്പോഴത്തെയും ഭരണാധികാരികളെപ്പോലെ ഞാന്‍ ഒരിക്കലും അഴിമതി ചെയ്യില്ല. ഒരു തുള്ളി അഴിമതി പോലും എന്നെ കളങ്കപ്പെടുത്തില്ല. അഴിമതി എന്നെ കളങ്കപ്പെടുത്താന്‍ ഞാന്‍ അനുവദിക്കില്ല' വിജയ് പറഞ്ഞു.
സമ്മര്‍ദ്ദമുണ്ടോ എന്ന് ചോദിച്ചാല്‍ സമ്മര്‍ദ്ദമുണ്ട്. പക്ഷേ നമുക്കില്ല. ജനങ്ങള്‍ക്ക് അതുണ്ട്. വഞ്ചിക്കപ്പെട്ട ആളുകള്‍ സമ്മര്‍ദ്ദത്തിലാണ്. ഇപ്പോള്‍, ആളുകള്‍ എക്കാലത്തേക്കാളും ഞങ്ങളെ വിശ്വസിക്കുന്നു. തുറന്നുകാട്ടപ്പെടാന്‍ ആഗ്രഹിക്കാത്തതിനാല്‍ മറ്റുള്ളവര്‍ വര്‍ണ്ണാഭമായ തിരഞ്ഞെടുപ്പ് പ്രഖ്യാപനങ്ങള്‍ പുറപ്പെടുവിക്കുന്നു.
ആത്മാര്‍ത്ഥമായി നമുക്ക് വേണ്ടി ജോലി ചെയ്യാന്‍ ആരെങ്കിലും വരുമോ എന്ന് ആളുകള്‍ സമ്മര്‍ദ്ദത്തിലായിരിക്കുന്ന സമയമാണിത്. ഇപ്പോള്‍ ആളുകള്‍ നമ്മളില്‍ വിശ്വസിക്കുന്നു, വിജയ് ഞങ്ങളോടൊപ്പം നില്‍ക്കുമെന്ന് ആളുകള്‍ വിശ്വസിക്കുന്നു. അതിനാല്‍ ഇത് നമുക്ക് ഒരു പ്രധാന സമയമാണ്. ഞാന്‍ രാഷ്ട്രീയത്തില്‍ വന്നത് അടിമയാകാന്‍ വേണ്ടിയല്ലെന്നും അദ്ദേഹം കൂട്ടിച്ചേര്‍ത്തു.
