ബ്രിട്ടീഷ് പൗരന്മാര്‍ക്ക് സന്ദര്‍ശക വിസയില്‍ ഇളവുകള്‍ അനുവദിക്കാന്‍ ചൈനീസ് തീരുമാനം. 30 ദിവസം വരെയുള്ള ചൈനീസ് സന്ദര്‍ശനത്തിന് ബ്രിട്ടീഷ് പൗരന്മാര്‍ക്ക് ഇനി മുതല്‍ വിസ വേണ്ട. ചൈനീസ് പ്രസിഡന്റ് ഷി ചിന്‍പിങ്ങും പ്രധാനമന്ത്രി കീര്‍ സ്റ്റാര്‍മറും തമ്മില്‍ നടന്ന ചര്‍ച്ചയിലാണ് ഇതു സംബന്ധിച്ച് ധാരണയായത്. പദ്ധതി എന്നു മുതല്‍ പ്രാബല്യത്തിലാകും എന്നതടക്കമുള്ള വിശദാംശങ്ങള്‍ ഉടന്‍ പ്രഖ്യാപിക്കുമെന്നാണ് ഡൗണിങ് സ്ട്രീറ്റ് വൃത്തങ്ങള്‍ അറിയിക്കുന്നത്.
ബ്രിട്ടനില്‍ നിന്നുള്ള വിസകള്‍ക്ക് നിലവിലുള്ള പത്തുശതമാനം ഇറക്കുമതി ചുങ്കം അഞ്ചു ശതമാനമായി കുറയ്ക്കാനും ഇരു നേതാക്കളും തമ്മിലുള്ള കൂടിക്കാഴ്ചയില്‍ തീരുമാനമായി. ഇരുരാജ്യങ്ങളും തമ്മിലുള്ള വ്യാപാര വാണിജ്യ ബന്ധങ്ങള്‍ മെച്ചപ്പെടുത്തുന്നതിനും ദേശീയ സുരക്ഷ സംബന്ധിച്ച വിഷയങ്ങളിലും ഇരു നേതാക്കളും തമ്മിലുള്ള ചര്‍ച്ചയില്‍ ധാരണയായിട്ടുണ്ട്.
വിസയില്ലാതെ ചൈനയിലേക്ക് യാത്ര ചെയ്യാനുള്ള സാഹചര്യം ലക്ഷക്കണക്കിന് ആളുകള്‍ക്ക് പ്രയോജനകരമാകും. ബ്രിട്ടീഷ് പൗരത്വമെടുത്തിട്ടുള്ള മലയാളികള്‍ അടക്കമുള്ളവര്‍ക്കും ഈ ഇളവ് ഗുണം ചെയ്യും. 2024 ല്‍ 620000 പേരാണ് ബ്രിട്ടനില്‍ നിന്നും ചൈനയിലേക്ക് യാത്ര ചെയ്തത്. നിലവില്‍ ഫ്രാന്‍സ്, ജര്‍മനി, ഇറ്റലി, ഓസ്‌ട്രേലിയ, ജപ്പാന്‍ തുടങ്ങി 50 രാജ്യങ്ങളിലുള്ളവര്‍ക്ക് വിസയില്ലാതെ 30 ദിവസംവരെ ചൈനയിലേക്ക് യാത്ര ചെയ്യാം. ഈ പട്ടികയിലേക്കാണ് പുതിയതായി ബ്രിട്ടനും ചേരുന്നത്.
