യുകെയില്‍ ടിവി കാണാനുള്ള ലൈസന്‍സ് ഫീസ് വീണ്ടും ഉയര്‍ത്തി. പണപ്പെരുപ്പത്തിന് ആനുപാതികമായി ഈ വര്‍ഷം 5.50 പൗണ്ടിന്റെ വര്‍ധനവാണ് വരുത്തിയിരിക്കുന്നത്. പുതുക്കിയ നിരക്ക് ഏപ്രില്‍ 1മുതല്‍ നിലവില്‍ വരും. കളര്‍ ടെലിവിഷന് കാണുന്നതിന് 174.50പൗണ്ടായിരുന്നു നിലവിലെ നിരക്ക്. ഇതു കൂടി 180 പൗണ്ടാകും. ബ്ലാക്ക് ആന്‍ഡ് വൈറ്റ് ടെലിവിഷന് 60.50 പൗണ്ടാണ് പുതിയ ലൈസന്‍സ് ഫീസ്. രണ്ടു പൗണ്ടാണ് ഇതിന് വര്‍ധിക്കുന്നത്. 58.50 നിലവിലെ ബ്ലാക്ക് ആന്‍ഡ് വൈറ്റ് ലൈസന്‍സ് ഫീസ്.
2024 ല്‍ പണപ്പെരുപ്പ നിരക്ക് കൂടുതലായിരുന്നതിനാല്‍ 10.50 പൗണ്ടിന്റെ വര്‍ധനവാണ് ഉണ്ടായത്. പരസ്യ വരുമാനമില്ലാതെ പ്രവര്‍ത്തിക്കുന്ന ബിബിസിയുടെ പ്രവര്‍ത്തനത്തിനാണ് ലൈസന്‍സില്‍ നിന്നുള്ള വരുമാനം ഉപയോഗിക്കുന്നത്.
ബിബിസിയുടെ ഏതെങ്കിലും ചാനലിലെ പരിപാടികള്‍ ടിവിയിലൂടേയോ കമ്പ്യൂട്ടറിലൂടെയോ മൊബൈല്‍ ആപ്പിലൂടെയോ കാണുന്നതിനോ ഡൗണ്‍ലോഡ് ചെയ്യുന്നതിനോ ലൈസന്‍സ് ആവശ്യമാണ്. ഇതിന് വീഴ്ചയുണ്ടായാല്‍ ആയിരം പൗണ്ട് വരെ പിഴ ശിക്ഷയും കോടതി ചെലവും നല്‍കേണ്ടിവരും.
