നടന് ബിജു മേനോനെതിരേ ഫെഫ്ക ജനറല് സെക്രട്ടറി ബി. ഉണ്ണികൃഷ്ണന്. ബിജു മേനോന് കരാര് പ്രകാരമുള്ള പ്രൊമോഷനില് പങ്കെടുക്കാത്തതിനെത്തുടര്ന്ന് നിര്മാതാവിന് 25 ലക്ഷം രൂപ നഷ്ടമായെന്ന് ഉണ്ണികൃഷ്ണന് പറഞ്ഞു. കൊച്ചിയിലെ വാര്ത്താസമ്മേളനത്തിലായിരുന്നു ബി. ഉണ്ണികൃഷ്ണന്റെ ആരോപണം.
'മലയാള സിനിമയിലെ പ്രധാനപ്പെട്ട നടന് പ്രൊമോഷന് പോവാത്തതുകൊണ്ട് ഒരു നിര്മാതാവിന്, അദ്ദേഹം ഒരു സംവിധായകന് കൂടിയാണ്, ഞങ്ങളുടെ അംഗമാണ്, 25 ലക്ഷം രൂപയാണ് ചാനലില് നിന്ന് കിട്ടാനുള്ള തുകയില് കുറഞ്ഞത്. അതേ നടന് ജീത്തു ജോസഫ് സംവിധാനം ചെയ്ത സിനിമയില് പ്രൊമോഷന് പോയിട്ടില്ല. ഞാന് ബിജു മേനോനെക്കുറിച്ചാണ് സംസാരിക്കുന്നത്. പേരു പറയാന് മടിയുള്ള ആളല്ല ഞാന്. പ്രൊമോഷന് എന്നത് പ്രൊഡ്യൂസേഴ്സ് അസോസിയേഷന്റെ കരാറിലുള്ള കാര്യമല്ലേ’ എന്ന് ഉണ്ണികൃഷ്ണന് ചോദിച്ചു.
'പടം പ്രൊമോട്ട് ചെയ്യാനുള്ള ബാധ്യത എനിക്കാണെന്ന് കരാറില് ഒപ്പിട്ട ശേഷം പോവാതിരിക്കുക. അതിനെത്തുടര്ന്ന് നിര്മാതാവിന് 25 ലക്ഷം രൂപ നഷ്ടപ്പെടുക. ഇപ്പോള് വന്ന സിനിമയിലും ഇതു തന്നെയാണ് സംഭവിക്കുന്നത്’ എന്നും അദ്ദേഹം കൂട്ടിച്ചേര്ത്തു.
