ടിവികെ അധ്യക്ഷന്‍ വിജയ്ക്കും നടി തൃഷയ്ക്കും എതിരെ പരിഹാസ പരാമര്‍ശവുമായി തമിഴ്‌നാട് ബിജെപി അധ്യക്ഷന്‍ നൈനാര്‍ നാഗേന്ദ്രന്‍. വിജയ് ആദ്യം തൃഷയെ വിട്ട് പുറത്തുവരണം. രാഷ്ട്രീയത്തില്‍ ഇറങ്ങണമെങ്കില്‍ വിജയ് വീട്ടില്‍ നിന്ന് പുറത്തിറങ്ങണം. കുടുംബത്തെ നോക്കുകയും മുതിര്‍ന്നവര്‍ പറയുന്നത് കേള്‍ക്കുകയും വേണമെന്ന് നൈനാര്‍ പറഞ്ഞു. തമിഴ്‌നാട്ടില്‍ മത്സരം ഡിഎംകെയ്ക്കും ടിവികെയ്ക്കും ഇടയില്‍ ആണെന്ന് സേലത്തെ റാലിയില്‍ വിജയ് പ്രസംഗിച്ചതിന് പിന്നാലെയാണ് ബിജെപി നേതാവിന്റെ പരാമര്‍ശം.
'നിര്‍ഭാഗ്യവശാല്‍, വിജയ്ക്ക് ഒന്നും അറിയില്ല. അദ്ദേഹത്തിന് അനുഭവ സമ്പത്തില്ല. ആദ്യം അദ്ദേഹത്തോട് വീട്ടില്‍ നിന്ന് പുറത്തിറങ്ങാന്‍ പറയൂ. തൃഷയെ വിട്ട് പുറത്തിറങ്ങിയാല്‍ മാത്രമേ എല്ലാം നടക്കൂ. കുടുംബവുമായി നല്ല ബന്ധം നിലനിര്‍ത്തണം. നല്ല നേതാക്കള്‍ നയിക്കുന്ന പ്രസ്ഥാനങ്ങളെക്കുറിച്ച് നല്ല രീതിയില്‍ സംസാരിക്കണം'- എന്നാണ് നൈനാര്‍ നാഗേന്ദ്രന്‍ പറഞ്ഞത്.
മേല്‍ക്കൂരയില്‍ കയറി കോഴിയെ പിടിക്കാന്‍ കഴിയാത്ത ഒരാള്‍ക്ക്, ആകാശത്തേറി വൈകുണ്ഠത്തില്‍ പോകാന്‍ കഴിയുമോ എന്നും നൈനാര്‍ നാഗേന്ദ്രന്‍ ചോദിച്ചു. നടനായതുകൊണ്ട് മാത്രം വോട്ട് ബാങ്കിന്റെ 32 ശതമാനം ലഭിക്കുമെന്ന് പറയുന്ന ഒരാളെ തനിക്ക് എങ്ങനെ അംഗീകരിക്കാന്‍ കഴിയുമെന്നും നൈനാര്‍ നാഗേന്ദ്രന്‍ ചോദിക്കുന്നു.
