യുകെയില്‍ ജോലിയും പഠനവും സ്വപ്നം കാണുന്നവര്‍ക്ക് സുവര്‍ണാവസരം. യങ് പ്രഫഷണല്‍ സ്കീമിനായി അപേക്ഷ ക്ഷണിച്ചതായി ഹോം ഓഫിസ് അറിയിച്ചു. നറുക്കൊടുപ്പിനായി (ബാലറ്റ്) ഫെബ്രുവരി 19ന് ഇന്ത്യന്‍ സമയം 2.30 വരെ അപേക്ഷ സമര്‍പ്പിക്കാം. തിരഞ്ഞെടുക്കപ്പെടുന്ന 18നും 30നും ഇടയില്‍ പ്രായമുള്ള ഇന്ത്യന്‍ പൗരന്മാര്‍ക്ക് രണ്ടുവര്‍ഷം പഠിക്കാനും ജോലി ചെയ്യാനും അവസരം ലഭിക്കും. ബിരുദമാണ് യോഗ്യത. അപേക്ഷകരുടെ അക്കൗണ്ടില്‍ 2,530 പൗണ്ട് (മൂന്ന് ലക്ഷത്തിലധികം ഇന്ത്യന്‍ രൂപ) സമ്പാദ്യമായി ഉണ്ടായിരിക്കണം. 18വയസ്സിനു താഴെയുള്ള കുട്ടികളെ സംരക്ഷിക്കുന്നവരോ കൂടെ താമസിക്കുന്നവരോ ആകരുത് അപേക്ഷകര്‍.
ബാലറ്റില്‍ പേര് ചേര്‍ക്കുമ്പോള്‍ പേര്, ജനനത്തീയതി, പാസ്‌പോര്‍ട്ട് വിവരങ്ങള്‍, പാസ്‌പോര്‍ട്ടിന്റെ സ്കാന്‍ ചെയ്ത കോപ്പി അല്ലെങ്കില്‍ ഫോട്ടോ, ഫോണ്‍ നമ്പര്‍, ഇമെയില്‍ വിലാസം എന്നിവ നല്‍കണം. യങ് പ്രഫഷണല്‍ സ്കീമിലേക്ക് തിരഞ്ഞെടുക്കപ്പെടുന്നവര്‍ 90 ദിവസത്തിനകം വിസയ്ക്ക് അപേക്ഷിക്കണം. 319 പൗണ്ട് (39,336.69 ഇന്ത്യന്‍ രൂപ) അപേക്ഷാ ഫീസായും അടയ്ക്കണം. ഇമിഗ്രേഷന്‍ ഹെല്‍ത്ത് സര്‍ചാര്‍ജും ഇതില്‍ ഉള്‍പ്പെടും.
കൂടാതെ, അപേക്ഷകര്‍ അവരുടെ ബയോമെട്രിക് വിവരങ്ങള്‍ നല്‍കുകയും വേണം. തിരഞ്ഞെടുക്കപ്പെടാത്തവര്‍ക്ക് പദ്ധതിയിലേക്ക് വീണ്ടും അപേക്ഷിക്കാന്‍ അവസരമുണ്ട്. 3000 പേര്‍ക്കാണ് യങ് പ്രഫഷണല്‍ പദ്ധതി പ്രകാരം ഈ വര്‍ഷം യുകെയില്‍ എത്താനാകുക. രണ്ടാംഘട്ട ബാലറ്റ് (നറുക്കെടുപ്പ്) ജൂലൈയില്‍ നടക്കുമെന്നാണ് വിവരം. വിശദ വിവരങ്ങള്‍ക്ക് https://www.gov.uk/india-young-professionals-scheme-visa എന്ന ഔദ്യോഗിക വെബ്സൈറ്റ് സന്ദര്‍ശിക്കുക.
ഇന്ത്യ- യുകെ നയതന്ത്ര ഉഭയകക്ഷി ബന്ധം മെച്ചപ്പെടു‌ത്തുന്നതിനായാണ്‌ യങ് പ്രഫഷണല്‍സ് സ്കീം ആവിഷ്കരിച്ചത്. 2021 മേയ് മാസത്തില്‍ ഇരുരാജ്യങ്ങളും ഒപ്പിട്ട മൈഗ്രേഷന്‍ ആന്‍ഡ് മൊബിലിറ്റി ധാരണാപത്രത്തിന്റെ ഭാഗമായാണ് പദ്ധതി ആരംഭിച്ചത്.
