മലയാള സിനിമയ്ക്ക് നിരവധി മികച്ച കഥാപാത്രങ്ങള് നല്കിയ നടിയാണ് പാര്വതി തിരുവോത്ത്. മലയാളത്തിന് പുറമേ തമിഴിലും നടി അഭിനയിച്ചിട്ടുണ്ട്. പാ രഞ്ജിത്ത് സംവിധാനം ചെയ്ത 'തങ്കലാന്' എന്ന ചിത്രത്തിലെ പ്രകടനത്തിന് നടിയ്ക്ക് ഫിലിംഫെയര് പുരസ്കാരം ലഭിച്ചിരുന്നു. മാതാപിതാക്കളെ വേദിയിലേക്ക് ക്ഷണിച്ചുകൊണ്ടാണ് പാര്വതി പുരസ്കാരം ഏറ്റുവാങ്ങിയത്. ഇപ്പോഴിതാ പാര്വതി സോഷ്യല് മീഡിയയില് പങ്കുവെച്ച കുറിപ്പാണ് ശ്രദ്ധ നേടുന്നത്. താന് സിനിമയില് 20 വര്ഷം പൂര്ത്തി ആയെന്ന് പാര്വതി അറിയിച്ചു.
ഒരു നടിയുടെ ഷെല്ഫ് ലൈഫ് 7 വര്ഷമാണെന്ന് അഭിനയത്തിലേക്ക് കടക്കുമ്പോള് ഒരുപാട് പേര് പറഞ്ഞിരുന്നുവെന്നും ഈ കാലയളയില് കഴിയുന്നത്ര വാണിജ്യ സിനിമകള് ചെയ്ത് പണം സമ്പാദിക്കാന് ആളുകള് ഉപദേശിച്ചിരുന്നുവെന്നും പറയുകയാണ് നടി. എന്നാല് താന് ഇപ്പോള് സമ്പന്നയാണെന്നും നടി പറഞ്ഞു.
'2025 ഡിസംബറില് ഇന്ത്യന് സിനിമാ രംഗത്ത് ഒരു അഭിനേത്രി എന്ന നിലയില് എന്റെ 20 വര്ഷം പൂര്ത്തിയായി. ഞാന് സിനിമയില് അഭിനയിക്കാന് തുടങ്ങിയപ്പോള്, ഒരു നടിയുടെ 'ഷെല്ഫ്-ലൈഫ്' പരമാവധി 6-7 വര്ഷമാണെന്ന് എന്നോട് പറഞ്ഞിരുന്നു. "എല്ലാം പരമാവധി പ്രയോജനപ്പെടുത്തുക, കഴിയുന്നത്ര വാണിജ്യ സിനിമകള് ചെയ്യുക, അങ്ങനെ നിങ്ങള്ക്ക് ധാരാളം പണം സമ്പാദിക്കാം - നിങ്ങളുടെ മൂല്യങ്ങളോ ആക്ടിവിസമോ നിങ്ങളെ സമ്പന്നരാക്കില്ല' എന്ന് എന്നോട് പറഞ്ഞിരുന്നു.
അതെല്ലാം ഇപ്പോള് വെറും തമാശമാത്രമായി. എന്റെ കുടുംബം എപ്പോഴും എന്റെ കൂടെയുണ്ട്. ഏറ്റവും നല്ല കൂട്ടുകാര് എന്നെ പിന്തുണയ്ക്കുന്നു. തിരസ്കാരങ്ങളെക്കാള് മനുഷ്യത്വത്തെ തിരഞ്ഞെടുക്കാന് എന്നെത്തന്നെ നിരന്തരം വിലയിരുത്താനുള്ള കഴിവ് ഞാന് വളര്ത്തിയെടുത്തിട്ടുണ്ട്. ഞാന് ഒരു പ്രൗഡ് വിസില്ബ്ലോവര് ആയിരിക്കാം, എന്നിരുന്നാലും ശക്തമായ വേഷങ്ങള്ക്കായി എന്നെ തിരഞ്ഞെടുക്കുന്ന സമാന ചിന്താഗതിക്കാരായ, മിടുക്കരായ കഥപറയുന്നവരെ ഞാന് കണ്ടെത്തുന്നു. അതുകൊണ്ട് ഈ അര്ത്ഥത്തിലെല്ലാം എന്റെ ജീവിതം സമ്പന്നമാണ്. എന്തൊരു ജീവിതം! എന്റെ 6-ാമത്തെ വിജയത്തിന് നന്ദി ഫിലിം ഫെയര്,' പാര്വതി കുറിച്ചു.
