ആയിരക്കണക്കിന് നികുതിദായകരെ നേരിട്ട്ബാധിക്കുന്ന വമ്പന്‍ നികുതി പരിഷ്‌കാരങ്ങള്‍ വരുമെന്ന് മുന്നറിയിപ്പ്. സാമ്പത്തിക കാര്യങ്ങള്‍ കൈകാര്യം ചെയ്യുന്നത് പ്രതിസന്ധിയിലാക്കുന്ന മാറ്റങ്ങള്‍ വലിയ ഫൈനുകള്‍ അടിച്ചേല്‍പ്പിക്കാനും ഇടയാക്കും.
ഈ സ്പ്രിംഗ് സീസണ്‍ മുതലാണ് പ്രോപ്പര്‍ട്ടി ഉടമകള്‍, സെല്‍ഫ് എംപ്ലോയ്ഡ്, തനിച്ച് വ്യാപാരം ചെയ്യുന്നവര്‍ എന്നിവര്‍ വരുമാനവും, ചെലവും റിപ്പോര്‍ട്ട് ചെയ്യുന്ന രീതിയില്‍ കാതലായ മാറ്റങ്ങള്‍ വരുത്താന്‍ എച്ച്എം റെവന്യൂ & കസ്റ്റംസ് തയ്യാറെടുക്കുന്നത്. 'മേക്കിംഗ് ടാക്‌സ് ഡിജിറ്റല്‍ ഫോര്‍ ഇന്‍കം ടാക്‌സ്' എന്ന പേരിലാണ് പരിഷ്‌കാരം.
അടുത്ത രണ്ട് വര്‍ഷത്തില്‍ മൂന്ന് മില്ല്യണ്‍ ആളുകളെ മാറ്റം ബാധിക്കുമെന്നാണ് കരുതുന്നത്. 2015-ല്‍ പ്രഖ്യാപിച്ച പദ്ധതികളാണ് ഒരു ദശകം വൈകി നടപ്പില്‍ വരുന്നത്. എന്നാല്‍ മാറ്റങ്ങളെ കുറിച്ച് ആളുകള്‍ക്ക് കാര്യമായി ധാരണയായില്ലാത്തത് പ്രതിസന്ധി രൂക്ഷമാക്കുമെന്ന് ടാക്‌സ് വിദഗ്ധര്‍ ചൂണ്ടിക്കാണിക്കുന്നു.
വാല്യൂ ആഡഡ് ടാക്‌സ് (വാറ്റ്) രജിസ്‌ട്രേഷനുള്ളവര്‍ക്ക് വര്‍ഷത്തില്‍ ഒമ്പത് തവണ വരെ ടാക്‌സ് ഫയല്‍ ചെയ്യേണ്ടതായി വരുമെന്നതാണ് അവസ്ഥ. നികുതിദായകര്‍ തേര്‍ഡ് പാര്‍ട്ടി സോഫ്റ്റ്‌വെയറുകള്‍ ഉപയോഗിച്ച് ഓരോ പാദത്തിലും നികുതിയും, ചെലവുകളും അപ്‌ലോഡ് ചെയ്യേണ്ടതായി വരും. ഇതിനായി 35 പൗണ്ട് വരെ പ്രതിമാസം ചെലവും നേരിടും.
പുതിയ നിയമങ്ങള്‍ പാലിക്കാത്തവര്‍ക്ക് പെനാല്‍റ്റി പോയിന്റ് സിസ്റ്റം വഴി ശിക്ഷിക്കുകയും, ഫൈനുകള്‍ ഏര്‍പ്പെടുത്തുകയും ചെയ്യും. ഏപ്രില്‍ 6 മുതല്‍ നടപ്പിലാക്കുന്ന മാറ്റങ്ങള്‍ 864,000 പേരെ ബാധിക്കുമെന്നാണ് കണക്കാക്കുന്നത്. കണ്‍സള്‍ട്ടന്റുമാരും, ഫോട്ടോഗ്രാഫര്‍മാരും, മുതല്‍ ലാന്‍ഡ്‌ലോര്‍ഡ്‌സിനെ വരെ ഇത് ബാധിക്കും. ഓരോ വര്‍ഷവും സെല്‍ഫ് അസസ്‌മെന്റ് ടാക്‌സ് റിട്ടേണ്‍ സമര്‍പ്പിക്കുന്നവരെയും, സ്വയംതൊഴില്‍, പ്രോപ്പര്‍ട്ടി എന്നിവയിലൂടെ വരുമാനം നേടുന്നവര്‍ക്കും മാറ്റം ബാധകമാകും. വരുമാനത്തിന്റെ തോത് അനുസരിച്ചാണ് മൂന്ന് മാസം കൂടുമ്പോള്‍ റിട്ടേണ്‍ സമര്‍പ്പിക്കുന്ന കാര്യത്തില്‍ വ്യക്തത വരിക.
