ഇംഗ്ലണ്ടിലും വെയില്‍സിലും കന്നുകാലികളെ ആക്രമിക്കുന്ന നായകളുടെ ഉടമസ്ഥര്‍ക്ക് ഇനി കര്‍ശന ശിക്ഷ . പുതുക്കിയ നിയമപ്രകാരം ഇത്തരം ആക്രമണങ്ങള്‍ക്ക് ഉത്തരവാദികളായ നായ ഉടമകള്‍ക്ക് പരിധിയില്ലാത്ത പരമാവധി പിഴ ശിക്ഷ ലഭിക്കാം. കൂടാതെ അപകടകാരികളായ നായകളെ പോലീസ് പിടിച്ചെടുക്കാനും, ഡി.എന്‍.എ പരിശോധനകള്‍ നടത്താനും അധികാരം നല്‍കുന്നുണ്ട്. പഴയ ലൈവ്‌സ്റ്റോക്ക് നിയമത്തില്‍ ഉണ്ടായിരുന്ന പരിമിതികള്‍ മാറ്റിയാണ് ഈ നിയമം നടപ്പിലാക്കുന്നത്.
2025-ല്‍ ഏകദേശം 2 മില്യണ്‍ പൗണ്ട് മൂല്യമുള്ള കന്നുകാലികള്‍ നായ ആക്രമണത്തില്‍ കൊല്ലപ്പെടുകയോ ഗുരുതരമായി പരിക്കേല്‍ക്കുകയോ ചെയ്തതായാണ് പുറത്തുവരുന്ന റിപ്പോര്‍ട്ടുകള്‍ സൂചിപ്പിക്കുന്നത് . ഒരൊറ്റ സംഭവത്തില്‍ 35-ഓളം ആടുകളും കുഞ്ഞാടുകളും നഷ്ടപ്പെട്ടതായി സോമര്‍സെറ്റിലെ ഒരു കര്‍ഷകനായ ജോഷ്വ ഗേ പറഞ്ഞു.
പുതിയ നിയമപ്രകാരം റോഡുകളിലും പൊതുപാതകളിലും സംഭവിക്കുന്ന ഇത്തരം ആക്രമണങ്ങളുടെ പേരില്‍ കേസെടുക്കാന്‍ കഴിയും . കൂടാതെ പുതിയ ചില വിഭാഗങ്ങളും സംരക്ഷിത കന്നുകാലികളുടെ പട്ടികയില്‍ ഉള്‍പ്പെടുത്തിയിട്ടുണ്ട്. ഉത്തരവാദിത്വമുള്ള നായ ഉടമകള്‍ക്കും ചില സാഹചര്യങ്ങളില്‍ പ്രശ്നങ്ങള്‍ ഉണ്ടാകാമെന്ന മുന്നറിയിപ്പും വിദഗ്ധര്‍ നല്‍കുന്നു. കന്നുകാലികള്‍ ഉള്ളിടങ്ങളില്‍ നായയെ എപ്പോഴും തുടലിലോ ബെല്‍റ്റില്‍ പിടിച്ച് നിര്‍ത്തുന്നതാണ് ഏറ്റവും സുരക്ഷിതമെന്നതാണ് പൊതുവായ നിര്‍ദ്ദേശം.
