ശാസ്ത്രീയമായി ഒരു അടിസ്ഥാനവുമില്ലാത്ത മരുന്നുകള് ഗുരുതര രോഗികള്ക്ക് നിര്ദ്ദേശിച്ച ഇന്ത്യക്കാരിയായ ഡയറ്റീഷന്റെ ലൈസന്സ് എന്എച്ച്എസ് റദ്ദാക്കി. അപര്ണ ശ്രീവാസ്തവയ്ക്കാണ് ജോലി നഷ്ടമായത്. 91 വയസുള്ള പാര്ക്കിന്സണ്സ് രോഗിയോട് യോഗ ചെയ്യാനും എഫ് എം കേട്ട് സമ്മര്ദ്ദം കുറക്കാനും ഒരു ഉരുള 32 തവണ ചവിച്ച് ഇറക്കാനും നിര്ദ്ദേശം നല്കിയിരുന്നു.
ഈസ്റ്റ് യോര്ക്ക്ഷയറിലെ ഹളിലെ ആശുപത്രിയിലാണ് അപര്ണ ജോലി ചെയ്തിരുന്നത്. അപര്ണ നല്കിയ അശാസ്ത്രീയ രീതികള് അറിഞ്ഞ് സഹപ്രവര്ത്തകരില് ഒരാള് പരാതി നല്കുകയായിരുന്നു. തുടര്ന്ന് നടത്തിയ അന്വേഷണത്തിലാണ് രോഗികള് ഞെട്ടിക്കുന്ന വിവരം കൈമാറിയത്.
കീമോയേക്കാള് ആയിരം മടങ്ങ് ഗുണം ചെയ്യും ഒരു നാരങ്ങ പിഴിഞ്ഞ് കുടിച്ചാലെന്നാണ് ഇവര് പറഞ്ഞിരുന്നത്. എണീറ്റ ഉടന് മൂന്ന് സ്പൂണ് വെളിച്ചെണ്ണ കുടിക്കുന്നത് കാന്സര് അകറ്റുമെന്നു ഇവര് ഇമെയില് വഴി രോഗിയോട് പറഞ്ഞു.
മെയിലുകള് പുറത്തുവന്നതോടെ ആറുമാസത്തെ സസ്പെന്ഷന് നല്കി. പിന്നീട് ലൈസന്സ് സസ്പെന്ഡ് ചെയ്തു.വാട്സ് ആപ്പ് ഫോര്വേഡായി ലഭിച്ച വിവരങ്ങളാണ് രോഗിക്ക് നല്കിയതെന്ന് ഇവര് അന്വേഷണ സംഘത്തോട് വിശദീകരിച്ചു. ഇതാണ് നടപടിയ്ക്ക് ആധാരമായത്.
