ഏക മകനെ തനിച്ചാക്കി കാന്‍സര്‍ രോഗത്തിന് കീഴടങ്ങിയ റെക്സാമിലെ ടിന്റു മാത്യു(35)വിന് വിട നല്കാന്‍ മലയാളി സമൂഹം. സംസ്‌കാര ചടങ്ങുകള്‍ 23 ന് റെക്‌സം സെന്റ് മേരീസ് കതീഡ്രലില്‍ ആണ് ഒരുക്കിയിട്ടുള്ളത്. രാവിലെ 10 മണിക്ക് റെക്‌സം കതീഡ്രലില്‍ എത്തിക്കുന്ന ഭൗതികശരീരം 10 മുതല്‍ 11.30 വരെ സുഹൃത്തുകള്‍ക്കും സഹപ്രവര്‍ത്തകര്‍ക്കും ആദരം അര്‍പ്പിക്കുന്നതിനുള്ള സമയമാണ്. തുടര്‍ന്ന് 11.45 ന് നോര്‍ത്ത് വെയില്‍സ് സീറോ മലബാര്‍ രൂപതാ ഇന്‍ ചാര്‍ജ് ഫാ സിജോ മണിപറമ്പിലും മറ്റ് വൈദികരും ചേര്‍ന്ന് പരിശുദ്ധ കുര്‍ബാനയും ഒപ്പിസും അനുസ്മരണവും നടത്തുന്നു. 2 മണിയോടെ മൃതദേഹം ടിന്റുവിന്റെ ആഗ്രഹപ്രകാരം സംസ്‌കരിക്കുന്നതിനായി റെക്‌സം പ്ലാസ് ആക്റ്റണ്‍ സെമിത്തേരിയിലേക്ക് കൊണ്ടു പോകും.
പ്രത്യേക പ്രാര്‍ത്ഥനയും സംസ്‌കാര ശുശ്രൂഷകളും പങ്കെടുക്കാനെത്തുന്നവര്‍ ടിന്റുവിന്റെ ആഗ്രഹം പ്രകാരം കളര്‍ഫുള്‍ ആയ ഡ്രസ്സുകള്‍ ധരിച്ചു വേണം യാത്രമൊഴി നല്കാനെത്തേണ്ടതെന്ന് അറിയിച്ചിട്ടുണ്ട്. എപ്പോഴും സന്തോഷത്തിലും ചെറു പുഞ്ചിരിയോടെ സംസാരിച്ച്ജീവിച്ച ടിന്റു ഏതു വേദനയും പോസിറ്റീവ് ആയി മാത്രമാണ് കണ്ടിരുന്നത്.
പാലക്കാട് സ്വദേശിനിയും വേങ്ങമലയില്‍ കുടുംബാംഗവുമായ ടിന്റു സിംഗിള്‍ മദറായിരുന്നു. ഏകമകനായ ആരോണ്‍ എന്ന അഞ്ചു വയസുകാരനെ നാട്ടില്‍ പ്രിയപ്പെട്ടവരെ ഏല്‍പ്പിച്ചാണ് യുകെയിലേക്ക് ജോലിക്കെത്തിയത്. റെക്സാം ഹോസ്പിറ്റലിലെ സ്റ്റാഫ് നഴ്സായിരുന്നു ടിന്റു. ആദ്യമെത്തിയ കാന്‍സര്‍ രോഗത്തില്‍ നിന്നും മുക്തയായ ടിന്റു പുതിയ ജീവിതത്തിലേക്ക് പ്രതീക്ഷയോടെ കാല്‍വെച്ച് നടക്കവേയാണ് വീണ്ടും രോഗമെത്തിയത്.
