ലണ്ടനില്‍ മുങ്ങിമരിച്ച നിലയില്‍ മലയാളി യുവതിയെ കണ്ടെത്തിയ സംഭവത്തില്‍ തുടര്‍നടപടികള്‍ പൂര്‍ത്തിയാക്കി മൃതദേഹം നാട്ടിലേക്ക് . തിങ്കളാഴ്ച പുലര്‍ച്ചെ മംഗളൂരു എയര്‍പോര്‍ട്ടില്‍ എത്തിക്കുന്ന മൃതദേഹം രാവിലെ പത്തുമണിയോടെ വീട്ടിലെത്തിക്കും. തുടര്‍ന്ന് ഉച്ചയ്ക്ക് 12 മണിക്ക് സംസ്‌കാരം. നടത്തും. കാസര്‍കോട് ജില്ലയിലെ കാഞ്ഞങ്ങാട് വെള്ളിക്കോത്ത് കാരക്കുഴി കീര്‍ത്തിവിനായകയില്‍ കീര്‍ത്തി രാജഗോപാല്‍ (25 ) ആണ് മരിച്ചത്.
വിദ്യാര്‍ത്ഥി വിസയില്‍ യുകെയിലെത്തിയ കീര്‍ത്തി രാജഗോപാല്‍ പോസ്റ്റ് സ്റ്റഡി വിസയില്‍ ജോലി ചെയ്യുകയായിരുന്നു. ഗവേഷണ പഠനത്തിനുള്ള തയ്യാറെടുപ്പും നടത്തിയിരുന്നു. ലണ്ടനിലെ ഡെസിമ സ്ട്രീറ്റ് സര്‍ജറിയില്‍ പേഷ്യന്റ് സര്‍വീസ് അഡൈ്വസറായി ജോലി ചെയ്തിരുന്ന കീര്‍ത്തി ഈസ്റ്റ് ലണ്ടനിലെ കാനറി വാര്‍ഫിന് സമീപമുള്ള ടവര്‍ ഹാംലെറ്റ്‌സ് ബറോയിലാണ് താമസിച്ചിരുന്നത്.
മാര്‍ച്ച് 30ന് ജോലി കഴിഞ്ഞ് വീട്ടിലെത്തിയ ശേഷം പുറത്തേക്കു പോയ കീര്‍ത്തിയെ അടുത്ത ദിവസങ്ങളിലാണ് തേംസ് നദീയുടെ തീരത്ത് മുങ്ങിമരിച്ച നിലയില്‍ കണ്ടെത്തിയത്. 31നാണ് മരണം സംഭവിച്ചത്. റിട്ട. സൈനികന്‍ രാജഗോപാലിന്റെയും എംപ്ലോയ്‌മെന്റ് എക്‌സ്‌ചേഞ്ച് ഉദ്യോഗസ്ഥയായ റീനയുടേയും മകളാണ്. സഹോദരന്‍ വിനായക്.
