ലണ്ടന്‍ നഗരത്തില്‍ വീണ്ടും ട്രെയിന്‍ സമരങ്ങളുടെ നാളുകള്‍. അണ്ടര്‍ഗ്രൗണ്ട് ട്യൂബ് സര്‍വീസിലെ ജീവനക്കാരാണ് അടുത്ത മൂന്നു മാസം ആറു സമരങ്ങളിലായി 12 ദിവസം പണിമുടക്കിന് നോട്ടീസ് നല്‍കിയിരിക്കുന്നത്. നിലവിലുള്ള ആഴ്ചയിലെ അഞ്ച് പ്രവര്‍ത്തിദിനങ്ങള്‍ നാലുദിവസമായി കുറയ്ക്കുന്നതിനെതിരെയാണ് ആര്‍എംടി യൂണിയന്റെ കീഴില്‍ ജീവനക്കാര്‍ സമരത്തിന് ഒരുങ്ങുന്നത്.
പ്രവര്‍ത്തിദിനങ്ങള്‍ നാലു ദിവസമാക്കാനുള്ള ട്രാന്‍സ്പോര്‍ട്ട് ഫോര്‍ ലണ്ടന്റെ (ടി.എഫ്.എല്‍) നിര്‍ദേശം യൂണിയന്‍ തള്ളി. മാനേജ്മെന്റിനെ സമ്മര്‍ദത്തിലാക്കാനുള്ള തുടര്‍ നടപടിയായാണ് 24 മണിക്കൂര്‍ വീതമുള്ള ആറു സമരങ്ങള്‍ അടുത്ത മൂന്നു മാസത്തിനുള്ളില്‍ നടത്താന്‍ യൂണിയന്‍ നോട്ടീസ് നല്‍കിയത്.
ഈ മാസം 21, 22, 23, 24 തീയതികളിലാണ് ആദ്യ സമരം. മേയ് 19, 20, 21, 22 തീയതികളില്‍ രണ്ടാം സമരം നടത്തും. ജൂണ്‍ 16, 17, 18, 19 തീയതികളിലാണ് മൂന്നാമത്തെ സമരം. വിവിധ ലൈനുകളില്‍ വിവിധ ഘട്ടങ്ങളിലാണ് സമരം നടത്താന്‍ ഉദ്ദേശിക്കുന്നത്. ലണ്ടന്‍ ഓവര്‍ഗ്രൗണ്ട്, ഡിഎല്‍ആര്‍, എലിസബത്ത് ലൈന്‍ എന്നിവയൊഴിച്ച് എല്ലാ സര്‍വീസുകളെയും സമരം ബാധിക്കും. ഈ ദിവസങ്ങളില്‍ ലണ്ടന്‍ നഗരത്തിലെ യാത്രകള്‍ ദുരിതമാകുമെന്ന് ചുരുക്കം.
ഈ യാത്രാ ദുരിതത്തിന് ആക്കം കൂട്ടാന്‍ ഏപ്രില്‍ 24ന് മറ്റൊരു ബസ് സമരവുമുണ്ട്. 8, എന്‍-8, 25, എന്‍-25, 425, 205, എന്‍-205 എന്നീ നമ്പറുകളിലെ ബസ് സര്‍വീസുകളാണ് ഏപ്രില്‍ 24ന് സമരത്തിന് നോട്ടീസ് നല്‍കിയിരിക്കുന്നത്.
