ഇറാന്‍ യുദ്ധവും ആഗോള തലത്തിലെ പ്രതിസന്ധികളും മൂലം ബ്രിട്ടനില്‍ പണപ്പെരുപ്പം കൂടുമ്പോഴും മോര്‍ട്ട്‌ഗേജ് വിപണിയില്‍ അസാധാരണ സാഹചര്യങ്ങള്‍. നിരക്കുകള്‍ കുതിച്ചുയരേണ്ടതിന് പകരം മോര്‍ട്ട്‌ഗേജ് നിരക്കുകള്‍ തിരിച്ചിറങ്ങുന്നുവെന്നാണ് കണക്കുകള്‍ വ്യക്തമാക്കുന്നത്.
നേഷന്‍വൈഡ് ബില്‍ഡിംഗ് സൊസൈറ്റി മോര്‍ട്ട്‌ഗേജ് നിരക്കുകള്‍ വെട്ടിക്കുറച്ചിരിക്കുകയാണ്. മറ്റ് അനവധി ഹൈസ്ട്രീറ്റ് ബാങ്കുകളും, ബില്‍ഡിംഗ് സൊസൈറ്റികളും ഈ നീക്കം തുടരുന്നുണ്ട്. ബ്രിട്ടനിലെ രണ്ടാമത്തെ വലിയ മോര്‍ട്ട്‌ഗേജ് ലെന്‍ഡറായ നേഷന്‍വൈഡ് ഇന്ന് മുതല്‍ ഫിക്‌സഡ് റേറ്റുകള്‍ 25 ബേസിസ് പോയിന്റാണ് വെട്ടിക്കുറയ്ക്കുന്നത്.
നേഷന്‍വൈഡിനൊപ്പം ഹാലിഫാക്‌സ് ഫിക്‌സഡ് റേറ്റ് പ്രൊഡക്ടുകളില്‍ 15 ബേസിസ് പോയിന്റുകളും വെട്ടിക്കുറച്ചിട്ടുണ്ട്. തങ്ങളുടെ ഹോം മൂവര്‍, ഫസ്റ്റ് ടൈം ബൈയര്‍ റേഞ്ചുകളിലാണ് ഈ ഇളവ് ലെന്‍ഡര്‍ നല്‍കുന്നത്. നേരത്തെ ടിഎസ്ബിയും തങ്ങളുടെ ചില മോര്‍ട്ട്‌ഗേജ് നിരക്കുകള്‍ 60 ബേസിസ് പോയിന്റ് കുറച്ചിരുന്നു. വിര്‍ജിണ്‍ മണി, സാന്‍ടാന്‍ഡര്‍, ബാര്‍ക്ലേസ്, എച്ച്എസ്ബിസി എന്നിവര്‍ നേരത്തെ ഈ വഴിക്ക് പോയതാണ്.
പുതിയ നിരക്ക് കുറയ്ക്കല്‍ വഴി നേഷന്‍വൈഡ് ഹോം മൂവേഴ്‌സിനായി ഏറ്റവും താഴ്ന്ന രണ്ട് വര്‍ഷത്തെ ഫിക്‌സഡ് റേറാണ് ഓഫര്‍ ചെയ്യുന്നത്, 4.5%. ഇതിന് 40 ശതമാനമെങ്കിലും ഡെപ്പോസിറ്റ് വേണം. 1499 പൗണ്ട് ഫീസിനൊപ്പമാണ് ഈ ഡീല്‍. ബാര്‍ക്ലേസിന്റെ രണ്ട് വര്‍ഷ ഫിക്‌സഡില്‍ 4.6 ശതമാനം നിരക്കും, 899 ഫീസുമാണ്.
