വിജയ് ഒഴിയുന്ന ഒരു സീറ്റില്‍ മത്സരിക്കാന്‍ തൃഷ, ജയിച്ചാല്‍ ഉപമുഖ്യമന്ത്രി!
തമിഴ്നാട്ടില്‍ ഗംഭീര വിജയം നേടിയ വിജയ്യുടെ ടിവികെ സര്‍ക്കാര്‍ രൂപീകരിക്കാനുള്ള ഒരുക്കത്തിലാണ്. ജയിച്ച കോണ്‍ഗ്രസ് സ്ഥാനാര്‍ത്ഥികളെയും സ്വതന്ത്രസ്ഥാനാര്‍ത്ഥികളെയും ഒപ്പം ചേര്‍ത്ത് കേവലഭൂരിപക്ഷം തികയ്ക്കാനാകും വിജയ് നയിക്കുന്ന ടിവികെ തയ്യാറെടുക്കുന്നത്. ഈ ചര്‍ച്ചകള്‍ ഒരു ഭാഗത്ത് നടക്കുന്നതിനിടെ രണ്ട് മണ്ഡലങ്ങളില്‍ മത്സരിച്ചു വിജയിച്ച വിജയ് ഏത് സീറ്റ് ഒഴിയുമെന്ന കാര്യത്തിലാണ് അടുത്ത ആകാംക്ഷ നിലനില്‍ക്കുന്നത്.
പേരമ്പൂര്‍, ട്രിച്ചി ഈസ്റ്റ് മണ്ഡലങ്ങളിലാണ് വിജയ് മത്സരിച്ചതും ജയം നേടിയതും. ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്യുന്നത് വിജയ് പേരമ്പൂര്‍ സീറ്റ് നിലനിര്‍ത്തിയേക്കുമെന്നും ട്രിച്ചി ഈസ്റ്റ് സീറ്റില്‍ നിന്ന് രാജി വയ്ക്കുമെന്നുമാണ്. ഉപതിരഞ്ഞെടുപ്പിലൂടെ വിജയ്യുടെ പിന്‍ഗാമിയായി ആരുവരുമെന്നാണ് പുതിയ ചര്‍ച്ചകള്‍. നിലവിലെ സാഹചര്യത്തില്‍ ട്രിച്ചി ഈസ്റ്റ് മണ്ഡലത്തില്‍ നടി തൃഷ മത്സരിച്ചേക്കുമെന്നും വിജയിച്ചാല്‍ തൃഷയെ ഉപമുഖ്യമന്ത്രിസ്ഥാനത്തേക്ക് പരിഗണിച്ചേക്കുമെന്നും അഭ്യൂഹങ്ങളുണ്ട്. ടിവികെ ഈ വിവരം ഇതുവരെ സ്ഥിരീകരിച്ചിട്ടില്ല. വിജയ് 14 ദിവസത്തിനകം ഏതെങ്കിലും സീറ്റില്‍ രാജിവയ്ക്കണം. ഏത് മണ്ഡലമായാലും ടിവികെ സ്ഥാനാര്‍ത്ഥിക്ക് വിജയം ഉറപ്പുതന്നെയാണ്.
കഴിഞ്ഞ ദിവസം വോട്ടെണ്ണല്‍ ആരംഭിച്ച സമയത്ത് തന്നെ തൃഷ തിരുപ്പതി ക്ഷേത്രദര്ശനം നടത്തിയിരുന്നു. ടിവികെ പതാകയുടെ നിറമുളള ഷാള്‍ ധരിച്ചായിരുന്നു ക്ഷേത്രദര്ശനം. തുടര്‍ന്ന് ഫലം വിജയ്‌ക്ക് അനുകൂലമായതിന് പിന്നാലെ നടി വിജയ്യുടെ വസതിയില്‍ എത്തിയിരുന്നു. നീലാങ്കരയിലുളള വീട്ടിലെത്തിയാണ് തൃഷ വിജയ്‌യെ കണ്ടത്. തൃഷയുടെ പിറന്നാള്‍ ദിനത്തിലായിരുന്നു വോട്ടെണ്ണല്‍ നടന്നത്.
വിജയ്യുടെ സിനിമകളിലെ നായികയും സുഹൃത്തും മാത്രമല്ല സമീപകാലത്ത് വിജയ്‌യുമായി ബന്ധപ്പെട്ട ഗോസിപ്പിലെ നായിക കൂടിയാണ് തൃഷ. തനിക്ക് മുഖ്യമന്ത്രിയാകാന്‍ ആഗ്രഹമുണ്ടെന്ന് ഒരിക്കല്‍ തൃഷ പറഞ്ഞ വീഡിയോ സമൂഹമാദ്ധ്യമങ്ങളില്‍ വൈറലാണ്. സംഗീതയുമായുള്ള വിവാഹബന്ധം വേര്‍പ്പെടുത്തിയാല്‍ വിജയ് തൃഷയെ വിവാഹം ചെയ്യുമെന്ന തരത്തിലും അഭ്യൂഹങ്ങളുണ്ട്.
