താരസംഘടനയായ 'അമ്മ'യുടെ ജനറല് സെക്രട്ടറി കുക്കു പരമേശ്വരനെതിരെ ഗുരുതര ആരോപണവുമായി അമ്മ മാനേജര് അതുല്യ രംഗത്ത്. അതുല്യയുമായി അപകീര്ത്തികരമായ ബന്ധമുണ്ടെന്ന് പറയാന് സെക്യൂരിറ്റി ജീവനക്കാരനെ കുക്കുപരമേശ്വരന് നിര്ബന്ധിച്ചെന്നാണ് പരാതി. കൊച്ചി സിറ്റി പൊലീസ് കമ്മീഷണര്ക്ക് അതുല്യ പരാതി നല്കി.
ഉണ്ണി ശിവപാലിന് വേണ്ടി കുക്കു പരമേശ്വരന് വഴിവിട്ട പ്രവര്ത്തനങ്ങള് നടത്തുന്നതായും ആരോപണമുണ്ട്. ഗൂഢാലോചനയും ഭീഷണിപ്പെടുത്തലും നടന്നുവെന്ന് സെക്യൂരിറ്റി ജീവനക്കാരന് മുഹമ്മദ് സമ്മതിക്കുന്ന ഓഡിയോ സംഭാഷണവും അതുല്യ പുറത്തു വിട്ടിട്ടുണ്ട്.
കുക്കു പരമേശ്വരനും ഉണ്ണി ശിവപാലും ചേര്ന്ന് ഒരു കാരണവുമില്ലാതെ തന്നെ ഓഫീസില് നിന്ന് പറഞ്ഞുവിട്ടെന്ന് അതുല്യ മുന്പ് ആരോപിച്ചിരുന്നു. അമ്മയിലും പൊലീസിലും തൊഴില് വകുപ്പിലും ഇതുസംബന്ധിച്ച് പരാതി നല്കിയിരുന്നു. ശേഷം ശ്വേതാ മേനോന് അതുല്യയെ തിരിച്ചെടുത്തിരുന്നു. തന്നെ പിരിച്ചുവിട്ടതിന്റെ ഭാഗമായി നടന്ന ഗൂഢാലോചനയുടെ പേരിലാണ് പൊലീസ് കമ്മിഷണര്ക്ക് പരാതി നല്കിയതെന്ന് അതുല്യ മാദ്ധ്യമങ്ങളോട് വ്യക്തമാക്കി. നീന കുറുപ്പ്, കുക്കു പരമേശ്വരന്, ഉണ്ണി ശിവപാല് എന്നിവര് ചേര്ന്നാണ് തിരക്കഥ തയ്യാറാക്കിയത്. ശബ്ദസന്ദേശം ഉള്പ്പടെയാണ് പരാതി നല്കിയതെന്നും ഇവര് പറഞ്ഞു.
