ഡര്‍ബിയില്‍ നിന്നും പാരിസിലേക്കുള്ള യാത്രയ്ക്കിടെ അപ്രതീക്ഷിതമായി വിധി കീഴടക്കിയ അങ്കമാലി സ്വദേശി ജീസി(49)ന്റെ മൃതദേഹം ഇന്ന് വൈകുന്നേരത്തോടെ കൊച്ചിയിലെത്തും. ഞായറാഴ്ച ജന്മനാടായ അങ്കമാലിയില്‍ ജിസിനായി അന്ത്യനിദ്ര ഒരുങ്ങും.അങ്കമാലിയിലെ കിടങ്ങൂര്‍ ഇന്‍ഫന്റ് ജീസസ് പള്ളിയില്‍ ഞായറാഴ്ച ഉച്ചക്ക് മൂന്ന് മണിക്കാണ് സംസ്‌കാരം.
യുകെയിലുള്ള ജീസിന്റെ ഭാര്യ ജോയ്‌സിയും മക്കളും കഴിഞ്ഞ ആഴ്ച നാട്ടിലേക്ക് പോയിരുന്നു. യുകെയില്‍ എത്തിയിട്ട് ഏകദേശം അഞ്ചു വര്‍ഷം ആയ ജീസിന് 12 വയസും രണ്ടു വയസും ഉള്ള രണ്ടു കുട്ടികളാണ് ഉള്ളത്. ഭാര്യ ജോയ്സി സെബാസ്റ്റ്യന്‍ ഇപ്പോള്‍ മൂന്നാമത്തെ കുഞ്ഞിനെ ഗര്‍ഭിണിയുമാണ്.
കെയര്‍ വിസയിലായിരുന്നു കുടുംബം യുകെയില്‍ എത്തിയത്. അടുത്തകാലത്താണ് ജോയ്സി നേഴ്‌സിങ് ഹോമില്‍ നഴ്സ് ആയി ജോലി ലഭിക്കുന്നത്. ലെസ്റ്ററില്‍ എത്തിയ കുടുംബം ഇതേത്തുടര്‍ന്നാണ് ഡര്‍ബിയിലേക്ക് വീട് മാറി എത്തുന്നത്. അങ്കമാലി കിടങ്ങൂര്‍ കുന്നപ്പള്ളി കുടുംബാംഗമാണ് ജീസ് ജോസ്. ജീസ് ലെസ്റ്റര്‍ ഹോസ്പിറ്റലില്‍ ഫെസിലിറ്റേറ്റര്‍ ആയി ജോലി ചെയ്ത് വരികയായിരുന്നു.
