ഉഷ്ണതരംഗത്തിന് വിരാമം കുറിച്ച് യുകെയില് ഈയാഴ്ച ഇടിയോടു കൂടിയ മഴയും ശക്തമായ കാറ്റും എത്തുമെന്ന് മുന്നറിയിപ്പ്. ആസ്ത്മ പോലുള്ള ശ്വാസകോശ രോഗങ്ങളുടെ ലക്ഷണങ്ങള് ഈ സമയങ്ങളില് കൂടുതല് തീവ്രമാകും എന്ന് എന് എച്ച് എസ് മുന്നറിയിപ്പ് നല്കി. കാലാവസ്ഥയിലുണ്ടാകുന്ന വ്യതിയാനം ഈ ലക്ഷണങ്ങളെ തീവ്രമാക്കുകയും, കൂടുതല് തവണ ഇന്ഹേലര് ഉപയോഗിക്കേണ്ടി വരികയും ചെയ്താല് ഉടനടി നിങ്ങളുടെ ജി പിയുമായോ 111 എന്ന നമ്പറിലോ ബന്ധപ്പെടണമെന്നാണ് മുന്നറിയിപ്പില് പറയുന്നത്.
ഇന്ഹേലര് ഉപയോഗിക്കണം എന്ന് നിങ്ങളോട് നിര്ദ്ദേശിച്ചിട്ടുണ്ടെങ്കില് നിര്ബന്ധമായും അത് ഉപയോഗിക്കണം എന്നും മുന്നറിയിപ്പില് പറയുന്നു. അത് എപ്പോഴും കൂടെകരുതാന് മറക്കുകയുമരുത്. ആസ്തമ, സി ഒ പി ഡി തുടങ്ങിയവയുള്ളവര്ക്ക് ഏറെ സഹായകരമാണ് ഇന്ഹേലര്. യു കെയില് ഏകദേശം 72 ലക്ഷത്തോളം ആസ്ത്മ രോഗികള് ഉണ്ടെന്നാണ് കണക്കാക്കപ്പെടുന്നത്.
ഇടിയും മഴയും, കാറ്റുമൊക്കെയുള്ള കാലാവസ്ഥയില് ആസ്ത്മ ഗുരുതരമായ നിലയിലേക്ക് ഉയരാനുള്ള സാധ്യത കൂടുതലായതിനാല് കരുതിയിരിക്കുക. ഇത്തരം കാലാവസ്ഥയില് കഴിയുന്നതും വീടുകള്ക്കുള്ളില് തന്നെ തുടരണമെന്നാണ് വിദഗ്ധര് ഉപദേശിക്കുന്നത്. ജനലുകളും വാതിലുകളും അടച്ചിടാന് ശ്രദ്ധിക്കുകയും വേണം.
