യൂറോ മില്യണ്‍ ലോട്ടറിയിലൂടെ കോടികള്‍ സ്വന്തമാക്കിയയാള്‍ കാര്‍ അപകടത്തില്‍ മരിച്ചു. ഹിറ്റ് ആന്‍ഡ് റണ്‍ കേസെടുത്ത് പൊലീസ്. എസെക്‌സില്‍ സൈക്കിള്‍ യാത്രക്കിടെ കാറിടിച്ച് ഗുരുതരമായി പരിക്കേറ്റാണ് ആന്റണി കാന്റി നാലു ദിവസത്തിന് ശേഷം ആശുപത്രിയില്‍ മരണമടഞ്ഞത്.
മേയ് 21ന് രാവിലെ ടിപ്ട്രീയില്‍ സൈക്കിളും കാറും കൂട്ടിയിടിക്കുകയായിരുന്നു.30 കാരനായ ആന്റണി കാന്റിക്ക് ഗുരുതരമായി പരിക്കേറ്റു. ആശുപത്രിയിലേക്ക് മാറ്റിയെങ്കിലും നാലു ദിവസത്തിന് ശേഷം മരണത്തിന് കീഴടങ്ങി.
സംഭവത്തിന് ശേഷം 18 കാരനായ യുവാവിനെ അപകടകരമായ ഡ്രൈവിങ്, മദ്യമോ മയക്കുമരുന്നോ ഉപയോഗിച്ചുള്ള ഡ്രൈവിങ്, ഹിറ്റ് ആന്‍ഡ് റണ്‍ എന്നീ കുറ്റങ്ങള്‍ ചുമത്തി അറസ്റ്റ് ചെയ്തിരുന്നു. സംഭവത്തില്‍ അന്വേഷണം തുടരുകയാണ് പൊലീസ്.
കോവിഡ് ലോക്ക്ഡൗണ്‍ സമയം ഹൃദയാഘാതം വന്ന പൊലീസ് ഉദ്യോഗസ്ഥന് സിപിആര്‍ നല്‍കി ജീവന്‍ രക്ഷിച്ച ആന്റണി കാന്റി ഏറെ ശ്രദ്ധ നേടിയിരുന്നു. അതേവര്‍ഷമാണ് യൂറോമില്യണ്‍സ് സമ്മാനം നേടിയത്.
യൂറോമില്യണ്‍സ് നറുക്കെടുപ്പില്‍ 10 ലക്ഷം പൗണ്ട് (ഏകദേശം 11 കോടി രൂപ) സമ്മാനം നേടിയെങ്കിലും ജോലി തുടരുമെന്ന് അദ്ദേഹം പ്രഖ്യാപിച്ചിരുന്നു.
സംഭവത്തില്‍ പൊലീസ് സിസിടിവി ദൃശ്യം ഉള്‍പ്പെടെ പരിശോധിക്കുകയാണ്.
